सिन्धुपाल्चोक । कांग्रेसका वरिष्ठ नेता रामचन्द्र पौडेलले प्रतिनिधि सभा बिघटन गरेर प्रधानमन्त्री केपी ओलीले देशलाई बर्बादीतर्फ लगेको आरोप लगाएका छन् । अवसरवादीहरुका कारण देश जटिल अवस्थामा पुगेको भन्दै नेता पौडेलले अब त्यसको विरुद्ध कांग्रे्रेसले अन्तिम समयसम्म लड्ने पनि बताए ।
नेपाली कांग्रेस सिन्धुपाल्चोक क्षेत्र नम्बर २ समितिले शनिबार मेलम्चीमा आयोजना गरेको भेलालाई सम्बोधन गर्दै पौडेलले भने, ‘जनप्रनिधिको सभालाई विघटन गरेर ओलीले देशलाई बर्बादीतर्फ धकेलेका छन् । अवसरवादीहरुका कारण देश जटिल अवस्थामा पुगेको छ । अब त्यको विरुद्ध नेपाली कांग्रेसले अन्तिमसम्म लड्नुपर्छ, लड्ने छ ।’
भेलालाई सम्बोधन गर्दै कांग्रेस केन्द्रीय सदस्य गगन थापाले प्रधानमन्त्रीले दिएको अभिव्यक्ति धेरैले चाख लगाएर सुन्ने र ताली बजाउने गरेको भए पनि वास्तवमा प्रधानमन्त्रीले नेपाली जनतालाई हेपेको आरोप लगाए । नेता थापाले प्रतिनिधि सभा विघटन हुनु दुखद् घटना भएको भन्दै यसको छिनोफानो देशको सर्वाेच्च अदालतले गर्ने समेत बताए ।
त्यस्तै, शनिबारको कार्यक्रममा राष्ट्रिय प्रजातन्त्र पार्टी परित्याग गरेर विभिन्न नेता कार्यकर्ता नेपाली कांग्रेस प्रवेश गरेका छन् । राप्रपाको मेलम्ची नगर समिति अध्यक्ष किरण दीप खड्का, गणेशविक्रम सिलवाललगायत करिब १०० को संख्यामा नेता–कार्यकर्ता नेपाली कांग्रेस प्रवेश गरेका हुन् ।
कार्यक्रममा केन्द्रीय सदस्य विष्णुविक्रम थापा, प्रदेश सांसद निमा लामा, जिल्ला सभापति विकास लामा, इन्द्रावती गाउँपालिका अध्यक्ष वंशलाल तामाङलगायतले सम्बोधन गरेका थिए ।
