सिरहा । सिरहाको लहान नगरपालिका वडा नम्बर – ५ स्थितमा वर्षौदेखि व्यवसायी गर्दै आएका व्यक्तिहरुको पसल भत्काउने कार्यमा मेयर मुनि साहले गुण्डागर्दी शैली प्रर्दशन गरेको स्थानीय चार दलिय राजनैतिक गठबन्धनको आरोप छ ।
शुक्रबार गठबन्धनमा आवद्ध नेपाली कांग्रेसका तर्फबाट नगरसभापति सुनिल कुमार महतो, जनता समाजवादी पार्टीका नगर अध्यक्ष दिनेश महतो, नेकपा माओवादी केन्द्रका नगर प्रतिनिधि विजयकुमार गुप्ता र नेकपा एकिकृत समाजवादीका नगर संयोजक विनोद साहले संयुक्त रुपमा प्रेस विज्ञप्ती जारी गरेका छन् ।
सहमति विपरित मेयर साहले बाहिरबाट लठैत बोलाएर व्यवसायीमाथि कुटपिट गराएको आरोप छ । पूर्व जानकारी नदिई जर्बजस्ती डोजर लगाएर पसल भत्काउने क्रममा लुटपाट पनि भएको विज्ञप्तीमा जनाएको छ । मेयरको यस्तो गुण्डागर्दीप्रति आफुहरुको घोर आपति रहेको गठबन्धनले जनाएको छ ।
घटनामा संग्लन उपर कडा कारवाहीको उनीहरुले माग गरेको छ । यसअघि लहान नगरपालिका ४ स्थित फोहोर फाल्ने विषयमा भएको विवादमा स्थानीयलाई यस्तै गुण्डागर्दी शैलीमा मेयर साहले कुटपिट गराएको विज्ञप्तीमा उल्लेख छ ।
