काठमाडौं । नेकपा (एमाले)को केन्द्रीय कमिटी र स्थायी कमिटी बैठक सोमबार (भोलि) बोलाइएको छ । केन्द्रीय कार्यालय सचिव शेरबहादुर तामाङका अनुसार विधान महाधिवेशनमा प्रस्तुत गरिने विधान मस्यौदा प्रस्तावमाथि छलफल गर्न सोमबार बैठक बोलाइएको हो ।
उनका अनुसार स्थायी कमिटीले विधान मस्यौदा प्रस्ताव पारित गरेपछि केन्द्रीय कमिटीमा पेस गरिनेछ । त्यसपछि उक्त प्रस्ताव साउन २७ भित्र सबै मातहत कमिटीहरूमा अध्ययन र सुझावका लागि पठाइनेछ ।
एमालेको विधान महाधिवेशन आगामी भदौ २७ र २८ गते तोकिएको छ, भने विधानअनुसार विधान महाधिवेशनको एक महिनाअघि सदस्यहरूलाई प्रस्ताव अध्ययनका लागि वितरण गर्नुपर्नेछ ।
त्यस्तै, तामाङका अनुसार सदस्यता नवीकरण र तल्ला तहका कमिटीहरूको गठन पुनर्गठनमा एमाले केन्द्रित हुनेछ ।
