काठमाडौं । नेपाली कांग्रेसले क्रियाशील सदस्यता नवीकरण र वितरणको अवधि बढाउने तयारी गरेको छ । पार्टी कार्यालय सानेपामा आइतबार बसेको कांग्रेसको पदाधिकारी र पूर्वपदाधिकारी बैठकमा धेरै जिल्लामा क्रियाशील सदस्यता नवीकरण र वितरण नसकिएकाले यसको अवधि बढाउने बिषयमा छलफल भएको हो ।
यसअघि कांग्रसले क्रियाशील सदस्यता नवीकरण र वितरणको अवधि चैत मसान्तसम्म कायम गर्ने निर्णय गरेको थियो । तर, थप गरिएको समयमा पनि उक्त काम सम्पन्न नभएकाले यसलाई थप गर्ने बिषयमा बैठकमा छलफल भएको प्रवक्ता विश्वप्रकाश शर्माले जानकारी दिनुभयो ।
महाधिवेशनको कार्यतालिकालाई असर नपर्ने गरि सदस्यता वितरण र नवीकरणको अवधि बढ्न सक्ने उहाले बताउनुभयो । पदाधिकारीको प्रस्ताव सोमबार बस्ने पार्टीको केन्द्रीय समितिको बैठकमा लगिने उहाले बताउनुभयो ।
त्यस्तै उहाँले कांग्रेसको नेतृत्वमा नयाँ सरकार गठनका लागि अन्य दलहसंग छलफल भएकाले माओवादी र जसपाले पार्टीभित्र छलफल गरेपछि पुनः उनीहरुसँग छलफल गरिने जानकारी दिनुभयो ।
आफ्नै नेतृत्वमा सरकार गठनका लागि यसअघि कांग्रेस माओवादी र जसपासंग सयुक्त छलफल गरेको थियो । आइतबारको पदाधिकारी र पूर्वपदाधिकारी बैठकमा सभापति शेरबहादुर देउवा र वरिष्ठ नेता रामचन्द्र पौडेल भने सहभागी हुनुभएन ।


