पर्सा । जिल्ला प्रहरी कार्यालय पर्साले चालु आर्थिक वर्षको साउनदेखि फागुनसम्मको अवधिमा स्रोत नखुलेको ५४ लाख ६९ हजार ३ सय २० रुपैयाँ बरामद गरेको छ ।

साउन महिनामा ६ लाख १६ हजार ८ सय ५०, कार्तिकमा १९ लाख ९१ हजार, मंसिर र पुषमा ४÷४ लाख, माघमा २ लाख ७४ हजार र फागुनमा १७ लाख ८७ हजार ४ सय ७० रुपैया पर्सा प्रहरीले बरामद गरेको तथ्यांकमा उल्लेख छ ।

पर्सा प्रहरीले उपलब्ध गराएको तथ्यांकअनुसार सोही अवधिमा हुण्डी कारोवारमा संलग्न १४ जनालाई प्रहरीले पक्राउ गरेको छ । साउनमा २ जना, कार्तिकमा ३ जना, मंसिरमा १ जना, पुष र माघमा २÷२ जना र फागुनमा ४ जनालाई प्रहरीले पक्राउ गरेको हो । जसमध्ये ११ जना धरौटिमा रिहा भएको तथ्यांकमा उल्लेख छ ।

सोही अवधिमा पक्राउ परेकामध्ये १ जनालाई बालसुधार गृहमा र २ जनालाई पुर्पक्षका लागी थुनामा राखिएको पर्साका प्रहरी प्रवक्ता एवम् प्रहरी नायब उपरिक्षक ओमप्रकाश खनालले बताए । भारतसँग खुल्ला सिमाना जोडिएको जिल्ला भएर पनि हुण्डी कारोवार नियन्त्रण गर्न चुनौति देखिएको प्रमुख प्रहरी उपरिक्षक ( एसपी ) बेलबहादुर पाण्डेले जानकारी दिए ।

विगतका वर्षहरुमा हुण्डि कारोवारको ट्रान्जिट प्वाइन्ट बनेको वीरगञ्जमा अहिले ह्रास आएको पाइएको छ । चालु आर्थीक वर्षको भदौ र असोजमा कुनै पनि हुण्डी कारोवार नहुनुले हुण्डी कारोवार न्युनिकरण भएको प्रमाणित गरेको छ ।