गौरभ साह / सिरहा । चैत आठ गते मृत अवस्थामा भेटिएका सिरहाको मिर्चैया नगरपालिका–७ का शिवकुमार यादवको हत्या आरोपमा उनकै काकाको छोरा सहित २ जना पक्राउ परेका छन् । २८ वर्षका शिवकुमारको अपहरण गरी हत्या गरेको आरोपमा प्रहरीले उनकै काकाका छोरा २७ वर्षीय विष्णु कुमार यादव र अभियुक्त विष्णु कुमार यादवको जेठान वडा न . ९ बस्ने राम बाबु यादबको छोरा २४ वर्षीय इन्द्र देव सिंह यादवलाई पक्राउ गरिएको इलाका प्रहरी कार्यालय मिर्चैयामा बिहिवार आयोजना गरिएको पत्रकार समेलनमा प्रहरी नायब उपरीक्षक राजेन्द्र श्रेष्ठले बताएका छन् ।
शिवकुमारको शव चैत ८ गते राति हत्या भएको अवस्थामा मिर्चैया नगरपालिका–१ स्थित एक आँपको बगैंचामा भेटिएको थियो । विष्णुले शिवकुमारको अपहरण गरी फिरौती मागेको र नदिँदा हत्या गरेको प्रारम्भिक अनुसन्धानबाट देखिएको प्रदेश २ का प्रहरी प्रमुख डीआईजी धिरजप्रताप सिंहले बताए । ‘विष्णुले आफ्ना सालो इन्द्रदेव यादवसँग मिलेर शिवकुमारको अपहरण गरी हत्या गरेको थियो ।
हत्यामा संलग्न दुबै जनालाइ बुधबार पक्राउ गरिएको छ ।’ प्रहरीका अनुसार विष्णुले शिवकुमारको परिवारसँग ५० लाख रुपैयाँ फिरौती मागेका थिए । फिरौती नपाएपछि चैत ८ गते राति हत्या गरी शव कंक्रिटले छोपेर भागेका प्रहरीको भनाइ छ ।
उनीहरुले शिवकुमारको मोवाइल भने खोलामा फालिदिएका थिए । शिवकुमारका दाजु हालै वैदेशिक रोजगारीबाट फर्केको हुनाले रकम असुल गर्ने उद्देश्यले अपहरण गरेको देखिएको डीआईजी सिंहले बताए ।
‘वैदेशिक रोजगारीबाट आएपछि माग्ने जति रकम पाउने सोंचका साथ र घरायसी वादविवाद रिसइबीको कारण शिवकुमारको अपहरण गरी हत्या गरेको देखिन्छ’ उनले भने । बिष्णु कुमार यादव २ वर्ष अगाडि पनि लागू औषध मुद्दामा पक्राउ परि सिरहा जिल्ला अदालतको आदेशले २ वर्ष कैद सजाय गरिएको थियो ।
