काठमाडौं । राष्ट्रपति विद्यादेवी भण्डारीले आज सर्वदलीय बैठक आह्वान गर्नुभएको छ । राष्ट्रपति भण्डारीले मुलुकमा विकसित पछिल्ला राजनीतिक घटनाक्रमका विषयमा छलफल गर्न सर्वदलीय बैठक आह्वान गर्नुभएको हो ।
राष्ट्रपति कार्यालय स्रोतका अनुसार बैठक दिउँसो ४ बजे शीतलनिवासमा बस्नेछ । बैठकमा पूर्वप्रधानमन्त्रीहरु तथा संसदमा प्रतिनिधित्व गर्ने मुख्य दल तथा साना दलहरुलाई बोलाइएको छ ।
आजको बैठकमा नेकपा एमाले, नेपाली कांग्रेस, नेकपा माओवादी केन्द्र, जनता समाजवादी पार्टी, राप्रपा, नेपाल मजदुर किसान पार्टी र राष्ट्रिय जनमोर्चालाई बोलाइएको राष्ट्रपति कार्यालय स्रोतले जनाएको छ ।
राष्ट्रपति भण्डारीको यो पहललाई सबै दलहरुबीच समझदारी गराउने प्रयासको रुपमा हेरिएकाे छ । पछिल्लो समय राजनीतिक दलहरुबीचमा असमझादरी र तिक्तता बढ्दै जाँदा देश बेमेलतिर मात्र हैन गम्भीर संकटतिर धकेलिने सम्भावनाहरु बढ्दै गएका छन् ।
संसद पुनर्स्थापनापछि सर्वोच्च अलदालतले नेकपा एमाले र नेकपा माओवदी ब्युँतिनेगरी आदेश जारी गरेपछि राजनीतिक वृत्तमा थप तरंग पैदा गरेकाे थियाे । त्यसपछि सरकार ढाल्ने र नयाँ सरकार बनाउने विषयमा दलहरु आ-आफ्नो समिकरण बनाउन लागिपरेका छन् ।
