काठमाडौं । नेपाल कम्युनिस्ट पार्टी ( नेकपा ) का वरिष्ठ नेता तथा पूर्वप्रधानमन्त्री झलनाथ खनाल उपचारका लागि भारतको राजधानी नयाँ दिल्ली प्रस्थान गरेका छन् ।
नेकपाका केन्द्रीय सदस्य तथा विदेश विभाग प्रमुख विष्णु रिजालका अनुसार पूर्वप्रधानमन्त्री खनाल उपचारका क्रममा शुक्रबार बिहान ११ बजे नेपाल एयरलाइन्सको उडानबाट दिल्ली प्रस्थान गरेका हुन् । उनको उपचार भारतको नयाँ दिल्ली स्थित अपोलो अस्पतालमा हुने छ । उनी केही दिन दिल्लीमा रहने छन् ।
केही समय अघिदेखि स्वास्थमा केही समस्या देखिएका कारण खनाल चीन जान चाहेका थिए । तर चीनमा १४ दिन क्वारेन्टिनमा बस्नै पर्ने बाध्यताका कारण उनी दिल्ली गएको पारिवारिक स्रोतले जनाएको छ । खनालकी श्रीमती रविलक्ष्मी चित्रकार पनि उनको साथमा गएकी छन् ।
पीसीआर परिक्षण निगेटिभ रहेको रिपोर्टसहित गएपछि भारतमा क्वोरिन्टनमा बस्नु पर्ने अनिवार्यता छैन । यसअघि खनालले अमेरिका र चीनमा उपचार गराएका थिए ।
