जनकपुरधाम । प्रदेश २ को पर्सामा सालोको सम्पत्ति हडप्ने लोभमा आफ्नै भदैको हत्या गरेको घटना सार्वजनिक भएको छ । पर्साको बहुदरमाई नगरपालिका ४ बहुअरी टोल बस्ने २१ वर्षीय अकलेश राउत यादवको हत्या उनकै फुपाजुले हत्या गरी रुखमा झुण्डयाएको घटना सार्वजनिक भएको हो ।
यादवको सम्पति हडप्ने लोभमा परी उनको हत्या उनकै फुपाजु पर्सागढी नगरपालिका ५ बस्ने ५१ वर्षीय भागरित राउत अहिरले गरेका हुन् । यादवको गत पुस १ गते मध्यान्ह १२ बजेको समयमा पर्सागढी नगरपालिका ६ चैनपुरस्थित रहेको उनकै खेतको रुखमा झुण्डिएको अवस्थामा शव फेला परेको थियो ।
यादवको फुपाजु भागरितले अन्य तीनजनासँग मिलेर हत्या गरी उनकै गलबन्दीले पासो लगाइ शवलाई झुण्डयाएका थिए । घटना भएको जानकारी पाउना साथ खटिएको प्रहरी टोलीले शवलाई नियन्त्रणमा लिएर अनुसन्धान अघि बढाएको थियो ।
अनुसन्धानको क्रममा प्रहरीले मृतक यादवको हत्यामा संलग्न रहेका उनका फुपाजु भागिरतसहित अन्य दुईजनालाई पनि पक्राउ गरेको छ ।
भागीरतसँगै पक्राउ पर्ने अन्यमा पर्सागढी नगरपालिका ५ बस्ने ४१ वर्षीय शेष ताहिर मिया र २७ वर्षीय छठु पटेल भन्ने दिनेश पटेल रहेको पर्साका प्रहरी उपरीक्षक ( एसपी ) बेलबहादुर पाण्डेले जानकारी दिए ।
सम्पतिको एक्लो हकदार भएकाले यादवको हत्या मृतक अकलेश राउत यादव आफ्ना आमाबाबुको एक्लो छोरा थिए । साथै उनका ठुलो बुवाको सम्पतिको पनि उनी नै एकलो हकदार थिए ।
उनीसँग जग्गा जमिन लगायतका सम्पति पनि टन्नै थियो। सोही सम्पतिलाई हडप्ने लोभमा परी यादवको उनकै फुपाजुसहित ३ जना मिलेर हत्या गरेको एसपी पाण्डेले बताए ।
यादवको मृत्यु भए सम्पतिको हक खाने आफु हुने लोभमा परी उनकै फुपाजुसहित तीनजना मिलेर हत्या गरेको अनुसन्धानको क्रममा खुल्न आएको पाण्डेको भनाइ छ । यादवको हत्या हुनुभन्दा दुई दिनअघि उनका फुपाजु भगिरतले मियाँ र पटेललाई आर्थिक प्रलोभनमा पारी हत्यामा संलग्न गराएको पाण्डेले बताए ।
भदैको हत्या गर्ने फुपाजुसहित पक्राउ परेका अन्य दुईजनाविरुद्ध कर्तव्य ज्यान मुद्दामा कारवाही प्रक्रियाअघि बढाइएको जिल्ला प्रहरी कार्यालय पर्साले जनाएको छ ।
