सिरहा । सिरहाको सीमावर्ती क्षेत्रमा प्रहरी र लागुऔषध कारोबारी समूहबीच गोली हानाहान भएको छ । जिल्लाको नवराजपुर गाउँपालिका-५ स्थित नेपाल-भारत सीमा क्षेत्रमा शुक्रबार दिउँसो दुई पक्षबीच भिडन्त भएको हो ।
विशेष सूचनाका आधारमा इलाका प्रहरी कार्यालय, महेशपुर पतारका प्रमुख प्रहरी निरीक्षक (इन्स्पेक्टर) विशाल मल्लको कमान्डमा खटिएको प्रहरी टोलीले लागुऔषध कारोबारी समूहलाई नियन्त्रणमा लिन खोज्दा उक्त घटना घटेको हो ।
प्रहरीले घेरा हाल्न खोजेपछि कारोबारी समूहले प्रहरी लक्षित गरी एक राउन्ड गोली प्रहार गरेका थिए । तर, उक्त गोलीबाट प्रहरीतर्फ कुनै क्षति नभएको जनाइएको छ ।
तसर्थ, आत्मरक्षा र कारोबारीलाई नियन्त्रणमा लिन प्रहरीले जवाफी कारबाहीमा दुई राउन्ड गोली चलाएको थियो । प्रहरीले चलाएको गोलीमध्ये एक गोली लागुऔषध कारोबारी समूहका सदस्य, भारतको मधुवनी जिल्लाका अब्दुल कलामको खुट्टामा लागेको छ ।
घाइते कलामलाई नियन्त्रणमा लिएर उपचारका लागि पठाइएको छ भने घटना र संलग्न अन्य व्यक्तिहरूका बारेमा प्रहरीले थप अनुसन्धान अघि बढाएको छ ।
