महोत्तरी । सशस्त्र प्रहरी बलले महोत्तरीमा तिस किलो गाँजा बरामद गरेको छ । गोप्य सूचनाको आधारमा बिओपी जलेश्वर र बिओपी मरुवाहीका सशस्त्र प्रहरी निरीक्षक बिर्खबहादुर शाही र सञ्वीवकुमार मगरदैता सहितको कमान्डमा खटिएको सन्युक्त टोलीले उक्त परिमाणको गाँजा बरामद गरेको हो ।
गाँजा तस्करी हुने सूचना पाएपछि संयुक्त टोली मंगलबार राति नै जलेश्वर नगरपालिका– ७ अंकारस्थित तस्करी हुने सम्भावित स्थलमा लुकिछिपी ड्युटी गरिरहेका थिए । सोही अवस्थामा बुधबारको मध्यरात गाँजा बोकेका तीनजनाको समूहमा आएका अज्ञात व्यक्तिहरू सशस्त्र प्रहरीको टोलीलाई देख्नासाथ भागेका थिए ।
तस्कर भाग्न सफल भए पनि उनीहरूसँग रहेको केही दस्ताबेज र तयारी गाँजा भने सशस्त्र प्रहरीले नियन्त्रणमा लिन सफल भएको छ । बरामद गाँजा र दस्ताबेजहरू आवश्यक कारबाही र अनुसन्धानका लागि सशस्त्र प्रहरीले जिल्ला प्रहरी कार्यालय महोत्तरीमा बुझाएको छ ।
