लहान । सिरहामा खोला किनारमा बोरामा बेरेर गाडिएको अवस्थामा एक बालिकाको शव फेला परेको छ ।
सिरहाको गोलबजार नगरपालिका वडा नम्बर -९ गोविन्दपुरस्थित घुर्मी खोला किनारमा बोराभित्र राखेर गाडिएको अवस्थामा १३ वर्षीया गुलशना खातुनको शव फेला परेको हो ।
गत फागुन २९ गते घरबाट निस्केकी खातुन बेपत्ता भएकी थिईन् । चैत १ गते आमा जाहेदा खातुनले इलाका प्रहरी कार्यालय मिर्चैयामा खोजतलास गरिदिन भनेर निवेदन दिएकी थिइन् ।
मंगलबार बिहान १० बजेतिर गोठालोहरूले झाडिबाट कुहिएको गन्ध आएको थाहा पाएपछि प्रहरीलाई खबर गरेका थिए । इलाका प्रहरी कार्यालय मिर्चैयाको टोलीले उत्खनन गर्दा खातुनको शव भेटिएको हो ।
तीन फिट खनेपछि जुटको बोरामा बेरिएको अवस्थामा बालिकाको शव फेला परेको मिर्चैयाका प्रहरी नायब उपरीक्षक सन्तबहादुर बाखुले बताए । घटनाबारे थप अनुसन्धान भइरहेको उनले बताए ।
