सिरहा । सिराहाको औरही गाउँपालिकामा बोक्सी भन्दै महिलालाई कुटपिट गरी यातना दिइएको आरोपमा एक युवकलाई प्रहरीले पक्राउ गरेको छ । औरही गाउँपालिका–५ की ५० वर्षीय हीरादेवी साहलाई बोक्सी भन्दै कुटपिट गरी जबर्जस्ती मलमूत्र कोच्याएको आरोपमा २९ वर्षीय घुरन साहलाई प्रहरीले पक्राउ गरेको हो ।
घुरन हीरादेवीका आफ्नै भतिजा हुन् । घटनाको विषयमा आधिकारिक जानकारी वा उजुरी नआएको भन्दै पीडित महिलालाई जिल्लामा ल्याउने प्रयास भइरहेको जिल्ला प्रहरी कार्यालय सिरहाका प्रमुख प्रहरी उपरीक्षक ( एसपी ) सुदीप राजभण्डारीले जानकारी दिए ।
उनले भने, ‘हामीले पीडितलाई यहीँ झिकाएर जानकारी लिँदैछौँ, त्यसपछि मात्र घटनाबारे केही भन्न सकिन्छ ।’ यता पीडित हीरादेवीले गाईलाई टुना गरेर मारेको आरोपमा जेठाजुका छोरा र बुहारीले कुटपिट गर्दै मानव मलमूत्र खुवाएका आरोप लगाएकी छन् । भतिज घुरनले कुटपिट गर्दै भुइँमा लडाएपछि बुहारीहरू कौशिला, निशा र कविताले जबर्जस्ती मानव मलमूत्र मुखमा कोचेको उनले बताइन् । हीरादेवीका श्रीमान् रामचलितर साह रोजगारका क्रममा भारतको चण्डीगढमा छन् ।
उनी छोराछोरीसहित घरमा बस्दै आएकी छन् । दुई छोरी र एक छोरामध्ये जेठी छोरी मात्र घरमा भएको मौका पारी आफूमाथि अमानवीय काम गरेको भन्दै उनले दोषीलाई कारबाहीको माग गरेकी छन् । घटनाबारे थप अनुसन्धान सुरु भएको प्रहरीले जनाएको छ ।
