आलोक यादव / सप्तरी । सप्तरीको छिन्नमस्ता गाउँपालिका-१, बरहिबिरपुरबाट प्रहरीले लागुऔषधसहित दुई जनालाई पक्राउ गरेको छ।
जिल्ला प्रहरी कार्यालय, सप्तरी , लागुऔषध नियन्त्रण ब्युरो कोटेश्वर काठमाडौं र लागुऔषध नियन्त्रण ब्युरो शाखा कार्यालय सिरहाको संयुक्त टोलीले विशेष सुराकीको आधारमा जाँच गर्ने क्रममा प्रहरीलाई देखेर भाग्ने प्रयास गरेपछि हवाई फायर गरेर उनीहरूलाई नियन्त्रणमा लिइएको हो।
पक्राउ पर्नेहरूमा छिन्नमस्ता गाउँपालिका-१, बरहिबिरपुरका ३० वर्षीय विशाल राय र डाकनेश्वरी नगरपालिका-७, मझौराका ३५ वर्षीय मनोज राय रहेका छन्। उनीहरूको साथबाट करिब २०० ग्राम खैरो हेरोइन, २ थान मोबाइल र एउटा मोटरसाइकल (स ८ प ८२२५) समेत बरामद भएको छ।
पक्राउ परेका दुवै जनालाई आवश्यक अनुसन्धान र कारबाहीका लागि जिल्ला प्रहरी कार्यालय, सप्तरी पठाइएको छ। उक्त स्थान जिल्ला प्रहरी कार्यालय, सप्तरीबाट करिब ७ किलोमिटर दक्षिणमा पर्छ।
