भक्तपुर । नेपाली कांग्रेसका सहमहामन्त्री जीवन परियारले पार्टी सभापति शेरबहादुर देउवाले आगामी १५औं महाधिवेशनमा सभापति पदमा उम्मेदवारी नदिने बताएका छन् ।
शनिबार भक्तपुरको सूर्यविनायकमा आयोजित नेपाली कांग्रेस नगर समितिको तेस्रो नगर सम्मेलनलाई सम्बोधन गर्दै उनले यस्तो बताएका हुन् ।उनले देउवा निरन्तर दुई कार्यकालसम्म मात्रै सभापति हुन सक्ने पार्टी विधानका कारण पदबाट विदा लिने तयारीमा रहेको जानकारी दिए ।
परियारले भने, “पार्टीको विधानमा लगातार दुई पटकसम्म मात्र सभापति हुन पाउने व्यवस्था छ। सभापतिज्यू आफैंले पनि यो कुरा सार्वजनिक रूपमा बताइसक्नु भएको छ। त्यसैले १५औं महाधिवेशनबाट कांग्रेसले नयाँ सभापति पाउनेछ।”
तर, नयाँ सभापतिको सम्भावित उम्मेदवारबारे उनले केही खुलाएनन् ।
नियमअनुसार २०८२ मंसिरमा हुनुपर्ने महाधिवेशन निर्धारित समयमा सम्भव नभएको उनले बताए ।“विधानमा एक वर्ष पछाडि सार्न सकिने व्यवस्था छ। मंसिरमा बस्ने बैठकले महाधिवेशनलाई एक वर्ष पछि धकेल्ने निर्णय गर्नेछ,” परियारले भने । उनका अनुसार अब महाधिवेशन २०८३ मंसिरभित्र सम्पन्न हुनेछ।
