सिरहा । सिरहा जिल्लाको सखुवानन्कारकट्टी गाउँपालिकामा फाल्गुन १५ गतेबाट १० दिने झण्डा महोत्सव हुने भएको छ । ‘कला संस्कृति हाम्रो स्वाभिमान, समृद्ध सखुवानन्कारकट्टी हाम्रो पहिचान’ भन्ने मूल नाराका साथ महोत्सवको सम्पुर्ण तयारी पूरा भएको पालिका अध्यक्ष केदारनाथ यादवले आज पत्रकार सम्मेलन गरेर जानकारी दिनुभएको छ ।
स्थानीय कृषिलाई प्राथमिकता दिन , बालविवाह, दाइजो प्रथा, लैङ्गिक हिंसा न्यूनीकरण गर्न , विद्यार्थीको क्षमता अभिवृद्धि, स्थानीय व्यवसाय प्रवर्द्धन तथा आफ्नो कला संस्कृतिको जगेर्ना गर्ने मुख्य उद्देश्यका साथ महोत्सवको आयोजना गरेको गाउँपालिका महोत्सव आयोजक मूल समितिका संयोजक समेत रहनुभएको यादवले बताए ।
महोत्सवले स्थानीय कृषि, शिक्षा, व्यवसाय, कला संस्कृति जगेर्नामा महत्त्वपूर्ण योगदान पुर्याउने उनले बताए । ‘जिल्लाको महत्त्वपूर्ण स्थानमा रहेर आफ्नो ठाउँको सही पहिचान हुन नसकेको भन्दै स्थानीय पहिचानको लागि पनि यसको महत्त्वपूर्ण योगदान रहन्छ’, अध्यक्ष यादवले भने ।
महोत्सवमा स्थानीय कृषि उपज, विभिन्न कृषि उपकरण, खाद्यान्न तथा घरेलु प्रायोजनका सामग्रीहरूको एक सय वटा स्टलहरू रहने अध्यक्ष यादवले पत्रकार सम्मेलनमा जानकारी दिए । महोत्सवको उद्घाटन गर्न पूर्व प्रधानमन्त्री माधव कुमार नेपाल आउने जानकारी दिइएको छ ।
