धनगढी । मुख्यमन्त्री दीर्घबहादुर साेडारीले विश्वास मत लिन बोलाइएको सुदूरपश्चिम प्रदेशसभाको बैठक स्थगित भएको छ।
आज बिहीबार बैठक सुरू हुने बित्तिकै प्रमुख प्रतिपक्षी दल नेपाली कांग्रेस, राष्ट्रिय प्रजातन्त्र पार्टी(राप्रपा) र नागरिक उन्मुक्ति पार्टी(नाउपा) रेशम चौधरी पक्षका सांसद्हरूले विरोध गरेपछि बैठक स्थगित भएको हो।
बैठकमा सरकार गठन र मुख्यमन्त्री नियुक्ती प्रक्रिया असंवैधानिक भएको भन्दै नारावाजी भएपछि सभामुख भीमबहादुर भण्डारीले आधा घण्टाको लागि बैठक स्थगित गरिएको जानकारी गराएका हुन्।
नागरिक उन्मुक्ती संसदीय दलका नेता घनश्याम चौधरीले असंवैधानिक तरिकाले मुख्यमन्त्री नियुक्त भएका छन्। ‘यसका लागि हामी अदालतसम्म पनि पुगेका छौं। अदातबाट पनि पूर्ण फैसला भएको छैन। यो सरकार खारेज हुनुपर्छ। विश्वासको मत दिने पक्षमा हामी छैनौं। प्रक्रिया नै गलत छ’ उनले भने।
सुदूरपश्चिम प्रदेशमा नागरिक उन्मुक्ति पार्टी विभाजित छ। रन्जिता पक्षका दुई जना सांसद नेकपा एकीकृत समाजवादी संसदीय दलका नेता एवम् मुख्यमन्त्री सोडारीलाई विश्वासको मत दिने तयारीमा छन् भने रेशम पक्षका पाँच जना सांसद् सरकारको विरोधमा उत्रिएका हुन्।
सुदूरपश्चिममा ५३ सांसद छन्। सोडारीले बहुमतको लागि २७ मत पाउनुपर्छ। यहाँ नेकपा एमालेका ११, नेकपा माओवादी केन्द्रका सभामुख बाहेक १०, एकीकृत समाजवादीका ४, नागरिक उन्मुक्तिका ७ र स्वतन्त्र एक सांसद छन्।
