बागलुङ । बागलुङ नगरपालिका तत्कालीन उपप्रमुख सुरेन्द्र खड्का र प्रशासकीय अधिकृतसहित ५ जना विरुद्ध अख्तियार दुरुपयोग अनुसन्धान आयोगले भ्रष्टाचार मुद्दा दायर गरेको छ । आइतबार विशेष अदालतमा मुद्दा दायर गरिएको आयोगका प्रवक्ता श्यामप्रसाद भण्डारीले जानकारी दिए।
प्रदेश सरकारले तोकेको भन्दा कम दररेट राखेर नदीजन्य पदार्थको कर संकलन गर्दा कर उठाई मिलेमतो गरी नगरपालिकालाई हानी नोक्सानी गरेको आगोगको ठहर छ । तोकेको दरमा सूचना प्रकाशन गरेर ठेक्का लगाउनुपर्नेमा सो नगरी बिक्री वितरण दर घटी निर्धारण गरेर राजस्व संकलन गर्दा नागरपालिकालाई १७ लाख ४० हजार हानी गरेको आयोगको अनुसन्धान निष्कर्ष छ ।
आयोगले तत्कालीन उपप्रमुख सुरेन्द्र खड्कालाई ३४ लाख ८० हजार, तत्कालीन वडाअध्यक्ष जीवन आचार्यलाई ३४ लाख ८० हजार र प्रमुख प्रशासकीय अधिकृत भीमबहादुर कुँवर र निमित्त प्रमुख प्रशासकीय अधिकृत हिमालयजिवी उपाध्यायसँग सोही परिणाममा बिगो माग दावी लिएको छ । राजस्व शाखाका सदस्य सचिवविरुद्ध पनि समान बिगो मागदावी लिएको प्रवक्ता भण्डारीले जानकारी दिए ।
