काठमाडौं । प्रहरीले काठमाडौं–६ बौद्धबाट अनलाइन जुवा खेलमा संलग्न ७४ जनालाई पक्राउ गरेको छ । महानगरीय प्रहरी परिसर काठमाडौं र प्रहरी वृत्त बौद्धको संयुक्त टोलीले जुवा खेलिरहेका उनीहरुलाई आइतबार पक्राउ गरेको हो ।
परिसरका प्रवक्ता एसपी दिनेशराज मैनालीका अनुसार दोलखा घर भई हाल बानेश्वर बस्ने ३० वर्षीय सुभाष घिसिङले बौद्धस्थित प्लटिङमा सञ्चालन गरेको रेष्टुरेन्टमा जुवा चल्दै आएको थियो ।
कोरोना महामारीको अवस्थामा ठूलो संख्यामा मानिसहरु जम्मा भई अनलाइन बिंगो खेल भइरहेको सूचना आएपछि प्रहरीको टोली त्यहाँ छापा मारेको थियो । परिसरले खेलमा प्रयोग गरिने सामग्री (मोबाइल), कुपन र नगदसमेत बरामद गरेको छ ।
प्रवक्ता एसपी मैनालीले ६६ जना पुरुष र ८ जना महिलालाई पक्राउ गरिएको र उनीहरुको साथबाट ६ लाख १९ हजार रुपैयाँ बरामद गरिएको जानकारी दिए । घटनाको सम्बन्धमा महानगरीय प्रहरी वृत्त बौद्धले मुलुक अपराध संहिताअनुसार जुवा खेल्न वा सट्टाबाजी गर्न नहुने कसुरअन्तर्गत थप अनुसन्धान गरिरहेको छ ।
