काठमाडौं । रक्षा मन्त्रालयका सचिव बेगेन्द्रराज शर्मा पौडेलले ५ दिनअघि पुस १४ मा अवकाश पाएका छन् । सचिवको ५ बर्षे पदावधिले उनले अवकाश पाएका हुन् । सचिव बढुवा भएको ४ बर्ष साढे ४ महिनाअघि २०७८ साउन २५ मा उनले रक्षा मन्त्रालयको जिम्मेवारी पाएका थिए ।
सर्वोच्च अदालतको परमादेशबाट शेरबहादुर देउवा प्रधानमन्त्री नियुक्त नभएको भए सचिव पौडेल मन्त्रालयको जिम्मेवारी नसम्हाली अवकाश हुने विशिष्ट श्रेणीका कर्मचारीका रुपमा दर्ज हुनेथिए । तर देउवाले उनलाई अन्तिम साढे ४ महिना रक्षा मन्त्रालयको सचिवमा सरुवा गरी न्याय गरेका छन् ।
रक्षा मन्त्री डा. मिनेन्द्र रिजालले नेपाली कांग्रेसको महामन्त्रीमा पराजीत भएपछि पदबाट राजीनामा दिइसकेका छन् । सचिव पौडेल पनि अवकाश भएका छन् ।
पौडेलको अवकाशसँगै प्रशासन समूहको एक सचिव पद रिक्त भएको छ । रिक्त सचिव बढुवाका लागि आज बढुवा समितिको बैठक बस्दैछ । बरिष्ठताका आधारमा सचिव बढुवाका दाबेदार सहसचिवहरुमा कृष्णबहादुर राउत, रामेश्वर दंगाल र मुकुन्द निरौला छन् ।
समितिले यिनै तीन जनाको सिफारिस गर्ने र तीमध्येबाट मन्त्रिपरिषदले बढुवा गर्नेछ ।सहसचिव दंगाल अर्थमन्त्रालयको राजस्व महाशाखा प्रमुख हुन् । राउत प्रधानमन्त्री तथा मन्त्रिपरिषद कार्यालयमा छन् भने निरौला गृहमन्त्रालयको शान्ति सुरक्षा महाशाखाका प्रमुख छन् । निरौला एक महिनाअघि मात्र गृहमा सरुवा भएका हुन् ।
