सिरहा । सिरहामा बेपत्ता भएका २ बर्षको बालक ४८ घण्टापछि सकुशल फेला परेका छन्। मंगलबार राती साढे ८ बजे घरको बरण्डाबाटै बेपत्ता भएका सिरहा नगरपालिका वडा नम्बर – १ डुम्बाखाताका प्रदिप यादव र संगीता कुमारी यादवका छोरा प्रियांसु यादव बिहिवार बेलुका ७ बजे भेटिएका हुन्।
सिरहा नगरपालिका–१ डुम्बाखाता बस्ने प्रदिप यादवको २ वर्षीय छोरा प्रियांसु आफनै घरको बरान्डामा खेलीरहेको अवस्थामा मंगलबार राति साढे ८ बजे बेपत्ता भएका थिए। बालक बेपत्ता भएलगतै परिवारजनले सिरहा प्रहरीलाई खबर गरेका थिए। परिवारजनले बालकको अपहरण भएको आशंका गरेका थिए ।
खोजतलासको क्रममा बिहीबार साँझ भारतको मधुवनीमा सकुशल भेटिएका बालक प्रियान्सुलाई जिल्ला प्रहरी कार्यालय सिरहामा ल्याई बालकको आमा संगिता कुमारी यादवलाई जिम्मा लगाई पठाईएको र घटना सम्बन्धमा थप अनुसन्धान कार्य भइरहेको जिल्ला प्रहरी कार्यालय सिरहाका प्रमुख प्रहरी उपरीक्षक ( एसपी ) सुदिप राज भण्डारीले जानकारी दिए ।
