काठमाडौं । आईजीपी दान बहादुर कार्कीले आफ्नो बैंक डिटेल्स र कल डिटेल्स रेकर्ड जाँच गर्न चुनौती दिएका छन् ।
प्रतिनिधिसभा अन्तर्गतको सार्वजनिक लेखा समितिमा जवाफ दिँदै आईजीपी कार्कीले आफ्नो बैंकिङ्ग कारोबारको विवरण र फोनको विवरण हेर्न चुनौती दिएका हुन् । बैठकमा जवाफ दिँदै कार्कीले भने, ‘मेरो र मेरा परिवारको बैंक डिटेल्स र कल डिटेल्स हेर्न अनुरोध गर्छु।’
निर्वाचन प्रहरीको पोशाक खरिदबारेको परेको उजुरीबारे छलफल गर्न समितिले आईजीपी कार्की र सशस्त्र प्रहरीका आईजी नारायणदत्त पौडेललाई समितिमा बोलाइएको थियो । बैठकमा राष्ट्रिय स्वतन्त्र पार्टी (रास्वपा)का सांसद खगेन्द्र सुनारले पोशाक खरिदबारे परेको उजुरीबारे आईजीपी कार्कीमाथी अमर्यादित आरोप लगाएका थिए । छानबिनको प्रक्रियालाई लिएर सांसद सुनारले बैठक बहिष्कार गरे ।
सुनारलाई जवाफ दिँदै आईजीपी कार्कीले ‘प्रहरीलाई घिसार्छु’ भन्नेहरूले पनि बडो मिठो कुरा गरेको सुन्न पाइयो बताए । उनले भने, ‘पाषाण युगिन मानसिकता भएका मानिसहरूबाट हामी शाषित हुँदै छौँ कि ? भन्ने चिन्ता गरिराखेकै बिचमा बडा दुधले नुहाएको कुरा सुनिन्छ ।’
सांसद सुनारले एक जना युवकको मृत्यु भएको घटनामा प्रहरीका अधिकृतलाई घिसार्ने अभिव्यक्ति दिएका थिए । त्यस्तै सुनारले आईजीपी कार्कीको घरबाट ३ करोड चोरी भएको आरोप लगाएका छन् । त्यसबारे जवाफ दिँदै कार्कीले भने, ‘न त ३ करोड हराएको छ, न हाम्रा परिवार संलग्न छन् ।’
७० वर्षको इतिहाँसमा प्रहरीलाई साधन र स्रोत सम्पन्न नबनाएको उल्लेख गर्दै कार्कीले भने, ‘हाम्रो बर्दी हेरेर तलका प्रहरीले पाएनन भनेर हुँदैन, यो हामीले किनेको हो । प्रहरी भएकै कारण सवै कुराको अवगाल खाइराख्नुपर्ने होला त ?’ आईजीपी कार्कीले भने, ‘उजुरकर्ताले जे भने पनि हुन्छ ?’
आफ्नो बैंक डिटेल्स निकालेर विभिन्न ठाउँमा वितरण गरिएको आईजीपी कार्कीले बताए । उनले भने, ‘हाम्रो बैंक डिटेल्स ठाउँ कु ठाउँमा वितरण गरिएको छ ।’
आफूविरुद्ध विभिन्न ठाउँमा उजुरी हालिएको उल्लेख गर्दै आईजीपी कार्कीले भने, ‘जिम्मेवारीमा बसेपछि कालकुट विष पिउनुपर्ने अवस्था बेहोर्नुपर्ने रहेछ ।’
