काठमाडौँ ।नेपाल प्रहरीको नेतृत्व सम्हालेदेखि नै सङ्गठन सुदृढीकरण र विधिको शासन स्थापित गर्न कडा कदम चालिरहेका प्रहरी महानिरीक्षक (आईजीपी) दानबहादुर कार्की विरुद्ध स्वार्थ समूहहरूले घेराबन्दी सुरु गरेका छन्।
पछिल्लो समय प्रहरी प्रशासनमा आफ्नो प्रभुत्व जमाउन नपाएका र ‘दलाली’ गर्ने बाटो बन्द भएका समूहहरूले विभिन्न सञ्चार माध्यम र सामाजिक सञ्जालको दुरुपयोग गर्दै आईजीपी विरुद्ध भ्रामक समाचार फैलाउन थालेका हुन्।
किन भइरहेको छ आक्रमण?
प्रहरी स्रोतका अनुसार, विगतमा सरुवा-बढुवा र ठूला ठेक्कापट्टामा बिचौलियाको भूमिका खेल्ने समूहलाई वर्तमान नेतृत्वले इन्ट्री निषेध गरेपछि उनीहरू आक्रोशित बनेका हुन्। “जबसम्म दलालहरूको स्वार्थ पूरा हुन्छ, तबसम्म उनीहरू मौन रहन्छन्। तर, जब विधि र प्रक्रियाले काम गर्न थाल्छ, तब नेतृत्वलाई विवादमा तान्ने खेल सुरु हुन्छ,” एक उच्च प्रहरी अधिकारीले बताए।
