हेटौँडा । नेपाली कांग्रेस बागमती संसदीय दलको निर्वाचनमा पराजित भएपछि मुख्यमन्त्री बहादुर सिंह लामाले लोकतान्त्रिक पद्धतीको उपयोग भएको बताएका छन्।
मुख्यमन्त्री लामाले संसदीय दलको नेताको लागि निर्वाचन हुनु लोकतान्त्रिक पद्धती भएको भन्दै राजीनामा भने नदिने बताए ।
उनले भने–‘यो लोकतान्त्रिक प्रणाली हो, पहिला मैले जितेँ अहिले उहाँले जित्नुभयो । तर विधि र विधानमा अघि बढ्नुपर्ने भन्ने कुरा हो। म ५ वर्षको लागि निर्वाचित भएको थिएँ। तर उहाँहरूले विधि मिचेर बीचमै यस्तो खेल खेल्नुभयो।’
अब बागमती प्रदेशको मुख्यमन्त्रीबाट राजीनामा दिनुहुन्छ कि ? भन्ने प्रश्नमा लामाले भने–‘किन राजीनामा दिने ? संसदीय दलको नेतामा पराजित भएको हो। कांग्रेसको विधानमा दलको नेता नभएपनि गठबन्धनको सरकारको नेतृत्व गर्न पाइन्छ भन्ने छ। त्यसैले म राजीनामा दिन्नँ।’
यसअघि १३ पुस २०७९ मा भएको संसदीय दलको चुनावमा लामाले बानियाँलाई ५ मतान्तरले पराजित गर्दै विजयी भएका थिए।
साढे २ वर्षपछि बानियाँले दलको कार्यालयमा अविश्वासको प्रस्ताव दर्ता गराएर लामा नेतृत्वको सरकार ढलाउने खेलमा जुटेका हुन्। अहिले लामा ८ मतान्तरले पराजित भएका हुन् ।
बुधबार हेटौंडामा भएको निर्वाचनमा कुल ३७ मत खसेकोमा बानियाँले २२ र उनका प्रतिस्पर्धी लामाले १४ मत प्राप्त गरे । एक मत भने बदर भएको छ ।
