लहान । नेपाली कांग्रेसका सिरहा जिल्ला सभापति तथा पूर्वसांसद रामचन्द्र यादवले सिरहाको लक्ष्मीपुर पतारी गाउँपालिकामा विकासले गति लिएको बताउनुभएको छ । उहाँले कृषि, स्वास्थ्य, शिक्षा लगायतका क्षेत्रमा व्यापक सुधार भएको र गाउँपालिकाको मुहार फेरिएको दाबी गर्नुभएको छ ।
जिल्ला सभापति यादवले भन्नुभयो, “लक्ष्मीपुर पतारीमा साँच्चिकै विकास भएको छ । टोल–टोलमा विकासका पूर्वाधारहरू पुगेका छन् । कृषि, स्वास्थ्य र शिक्षाको क्षेत्रमा जनताले महसुस गर्ने गरी काम भएको छ । यो सबै स्थानीय सरकारको इमान्दार प्रयास र सक्रियताको परिणाम हो ।” उहाँले चालु आर्थिक वर्षभित्र बाँकी रहेका योजनाहरू पनि सम्पन्न गरी लक्ष्मीपुर पतारीलाई नमूना गाउँपालिकाको रूपमा स्थापित गरिने प्रतिबद्धता व्यक्त गर्नुभयो ।
स्थानीय तहको निर्वाचनमा नेपाली कांग्रेसबाट निर्वाचित गाउँपालिका अध्यक्ष चतुरानन्द ठाकुर, उपाध्यक्ष अमरकला यादव लगायत सम्पूर्ण जनप्रतिनिधि र कर्मचारीहरूको अथक प्रयास र इमान्दारिताका कारण यो सम्भव भएको सभापति यादवको भनाइ छ ।
“गाउँपालिका अध्यक्ष ठाकुर, उपाध्यक्ष यादव , सम्पुर्ण कर्मचारीहरु र जनप्रतिनिधिहरुको नेतृत्वदायी भूमिका र सम्पूर्ण टिमको सक्रियताले विकास निर्माणका कामहरू तीव्र गतिमा अघि बढेका छन्,” यादवले भन्नुभयो, “जनताको करबाट उठेको एक–एक पैसाको सही सदुपयोग भएको छ र भ्रष्टाचारमा शून्य सहनशीलता अपनाइएको छ ।”
हालैका समाचारहरूले पनि लक्ष्मीपुर पतारीमा विकास निर्माणका कामहरूले तीव्रता पाएको देखाएका छन् । गाउँपालिकाले आगामी आर्थिक वर्षका लागि विकास निर्माणमा उल्लेख्य बजेट विनियोजन गरेको छ, जसले पूर्वाधार विकास, कृषि आधुनिकीकरण, स्वास्थ्य सेवाको स्तरोन्नति र शैक्षिक गुणस्तर सुधारमा केन्द्रित रहने जनाइएको छ ।
स्थानीय बासिन्दाहरूले पनि गाउँपालिकामा भइरहेका विकास निर्माणका कार्यहरूले आफ्नो जीवनस्तरमा सकारात्मक परिवर्तन आएको बताएका छन् । सडक सञ्जालको विस्तार, कृषिमा नयाँ प्रविधिको प्रयोग, स्वास्थ्य चौकीहरूको स्तरोन्नति र विद्यालयहरूको शैक्षिक वातावरणमा भएको सुधारले स्थानीयमा उत्साह छाएको छ ।
