राजविराज । सप्तरीको राजगढ गाउँपालिका–३ नर्घोस्थित रामकेबल मण्डलको घरबाट ठूलो परिमाणमा लागुऔषध गाँजा बरामद गरिएको छ ।
सशस्त्र प्रहरी बल बेस पातो र इलाका प्रहरी कार्यालय कल्याणपुरबाट संयुक्त रुपमा खटिएको प्रहरी टोलीले मण्डलको घरमा लुकाई छिपाई राखिएको ३८८ किलो ७३० ग्राम गाँजा बरामद गरेको हो ।
बिशेष सूचनाको आधारमा सशस्त्र प्रहरी निरीक्षक नरेन्द्र सिंह धामी र प्रहरी निरीक्षकको कमाण्डमा खटिएको टोलीले शनिबार बिहान १०:३० बजे मण्डलको घर खानतलासी गर्दा निर्माणाधीन शौचालयबाट २ बोरा, गाईगोठबाट १ बोरा र घरनजिकको बाँसझ्याङबाट ९ बोरा गरी जम्मा १२ बोरामा गाँजा फेला पारेको हो ।
प्रहरीले घटनास्थलबाट रामकेबल मण्डलकी श्रीमती ४१ वर्षीया रेखा कुमारी मण्डललाई नियन्त्रणमा लिई थप अनुसन्धानका लागि इलाका प्रहरी कार्यालय कल्याणपुर ल्याएको छ भने घटनासम्बन्धी थप अनुसन्धान भइरहेको जिल्ला प्रहरी कार्यालय सप्तरीले जनाएको छ ।
