काठमाडौं । प्रहरी महानिरीक्षक दिपक थापाले आगामी तालिम क्यालेण्डर निर्माणका क्रममा साइबर क्राइम, क्रिप्टोकरेन्सी, आर्थिक तथा वित्तिय अपराध सम्बन्धी अनुसन्धानका क्षेत्रलाई समेत समावेश हुनुपर्नेमा जोड दिएका छन् ।
आइतबार नेपाल प्रहरी प्रधान कार्यालयमा आयोजित प्रहरीको चालु आर्थिक वर्षको वार्षिक तालिम क्यालेण्डरको समीक्षा तथा आगामी आर्थिक वर्षको वार्षिक तालिम क्यालेण्डर तर्जुमा सम्बन्धी तीन दिवसीय गोष्ठीमा उनले सो विषयमा जोड दिएका हुन् ।
आईजीपी थापाले प्रशिक्षण प्रदायक इकाइहरूले अघिल्लो तालिम क्यालेण्डर बमोजिम संचालित तालिमहरूका असल पक्षहरूको निरन्तरता तथा देखिएका समस्या एवम् सुधारका लागि आवश्यक पक्षहरू समेतको समीक्षा गरे ।
साथै उनले आगामी दिनहरूमा तालिम सञ्चालन गर्दा दूरदृष्टि पुग्नुपर्ने विषयका सम्बन्धमा गोष्ठी फलदायी रहने अपेक्षा रहेको बताए ।
साइबर क्राइम, क्रिप्टोकरेन्सी, आर्थिक तथा वित्तिय अपराध सम्बन्धी अनुसन्धानका क्षेत्रलाई समेत सम्बोधन हुने तालिमका कार्यक्रम आगामी तालिम क्यालेण्डर निर्माणका क्रममा समावेश हुनुपर्नेमा उनको जोड छ ।
