काठमाडौं । सहकारीको करोडौं रकम अपचलन र ठगीको आरोप खेप्दै आएका राष्ट्रिय स्वतन्त्र पार्टी (रास्वपा)का सभापति एवम् गृहमन्त्री रवि लामिछानेले सुन तस्करी काण्डमा कारबाही सिफारिसमा परेका सहसचिव अरुण पोखरेललाई नवलपुर जिल्लाको प्रमुख जिल्ला अधिकारी (सीडीओ) बनाएका छन् ।
सुन तस्करीविरुद्ध गठित छानबिन आयोगले कारबाहीको सिफारिस गरेका विवादित सहसचिव पोखरेललाई लामिछानेले पुरस्कृत गरेर सीडीओ बनाएका हुन् । पोखरेललाई कारबाही गर्नुको साटो सीडीओ बनाएर सरुवा गरेपछि सुशासनका कुरा गर्ने गृहमन्त्री लामिछानेको अनुहार उदाङ्गो भएको छ ।
गृह मन्त्रालयले बुधबार १६ सीडीओसहित २५ सहसचिवको सरुवा गरेको छ । सरुवाको सूचीअनुसार सुन तस्करी छानबिन आयोगले कारबाही गर्न सिफारिस गरेका सहसचिव पोखरेललाई गृहमन्त्री लामिछानेले सीडीओ बनाएपछि गृह मन्त्रालयभित्र खैलाबैला भएको छ ।
गृहको एउटा विभागमा कार्यरत कर्मचारीलाई जिल्लाको बागडोरको जिम्मेवारी दिएर पठाएका गृहमन्त्री लामिछानेले सुन तस्करी प्रकरणमा कर्मचारीलाई बचाउन लागेका छन् ।
सुन तस्करीको अनुसन्धान गरिरहेका प्रहरी अधिकृतहरूलाई कारबाहीको दायरामा भन्दै जिम्मेवारीबिहीन बनाइरहँदा गृहमन्त्री लामिछानेले सहसचिव पोखरेललाई भने पुरस्कृत गरिरहेका छन् ।
छानबिनको नाममा प्रहरी अधिकृतहरूको मनोबल गिराइरहेका गृहमन्त्री लामिछानेले कर्मचारीलाई भने उत्कृष्ट जिम्ेवारी दिँदै छानबिन समितिको प्रतिवेदनको उपहास गरेका छन् ।
आयोगको प्रतिवेदनअनुसार प्रहरी कर्मचारीहरूलाई जिम्मेवारबिहीन बनाइरँदा कर्मचारीलाई थप जिम्मेवारी दिनुलाई गृहमन्त्री लामिछानेले प्रहरी संगठनप्रति गरेको पक्षपातपूर्ण व्यवहार मान्न सकिन्छ ।
सहसचिव पोख्रेल त्रिभुवन अन्तर्राष्ट्रिय विमानस्थलको भन्सार प्रमुख रहेकै समयमा २०७९ पुस १० गते इलेक्ट्रिक चुरोट भेपमार्फत् सुन तस्करी भएको थियो ।
तस्करीको समयमा जिम्मेवार पदमा रहेका पोखरेल तस्करीमा संलग्न रहेको ठहर गर्दै छानबिन आयोगले कारबाहीको सिफारिस गरेको छ ।
तत्कालीन समयमा चीनबाट भेपमार्फत ल्याइएको करोडौंको सुन विमानस्थलको भन्सारमा ल्याएर ४७ दिनपछि भन्सारका नासु रेवन्त खड्कासँगको मिलेमतोमा भन्सार एजेन्ट दिनेश बस्नेतले चोरेर भारतीय व्यापारी नन्दुकुमार राण्डुराम मर्गलेलाई बेचेका थिए । बस्नेतले मर्गलेलाई ९ करोड सुन बेचेर ६ करोड आफूले राखेको खुलेको थियो ।
त्यसबेला अनुसन्धानको दायरामा नआएका सहसचिव पोखरेलमाथि छानबिन आयोगले अनुसन्धान गर्दा उनी पनि संलग्न रहेको ठहर गरी कारबाहीको सिफारिस गरेको थियो ।
भेप प्रकरणमा खड्का र बस्नेतसहित वेदप्रकाश अग्रवाल, साहेब राव मर्गले, अमृत कार्की र निर्मल बिक पक्राउ परेका थिए ।
सुन तस्करी छानबिन आयोग पूर्वन्यायाधीश डिल्लीराज आचार्यको संयोजकत्वमा पूर्वएआईजी सहकुल थापा, पूर्वसहसचिवद्वय किशोरजंग कार्की र प्रेमराज जोशी सदस्य रहनेगरी गठन गरिएको थियो ।
आयोगले गृहमन्त्री लामिछानेलाई चैत १ गते ४८५ पृष्ठको प्रतिवेदन बुझाएको थियो ।
