जनकपुरधाम । धनुषाको शहीदनगर नगरपालिकाका पूर्व मेयर उदय बरबरिया यादवसहित १२ जनाले विशेष अदालतबाट सफाइ पाएका छन्।
बुधबार विशेष अदालतका अध्यक्ष एव न्यायाधीश टेकनरायण कुँवर, रामबहादुर थापा र रितेन्द्र थापाको संयुक्त इजलासले उनीहरुलाई भ्रष्टाचार मुद्दामा सफाइ दिएको हो।
सडक निर्माणमा काम भन्दा बढी भुक्तानी गरी भ्रष्टाचार गरेको भन्दै अख्तियार दुरुपयोग अनुसन्धान आयोगले २०७९ माघ २३ गते पूर्व मेयर यादव, उप–मेयर शिला कापर, तत्कालीन प्रमुख प्रशासकीय अधिकृत रामकिशोर महतो, वडा नम्बर ८ का वडाध्यक्ष तनुकलाल कुशियैत, अनुगमन समितका सदस्य कन्हैया मुखियासहित १२ जनामाथि विशेष अदालतमा मुद्दा दायर गरेको थियो।
आर्थिक वर्ष २०७४/७५ मा शहीदनगर नगरपालिका–८ भिसरभोरा टोलको नहरदेखि गोठकोयलपुरसम्म कृषि सडक निर्माण गर्दा फिल्डमा भएको भन्दा बढी काम गरेको भन्दै गलत नापी किताब र कार्यसम्पादन प्रतिवेदन तयार पारी उपभोक्ता समितिलाई बढी भुक्तानी गरी २ लाख १२ हजार ८ सय १६ रुपैयाँ भ्रष्टाचार गरेको दाबीसहित आयोगले विशेष अदालतमा आरोप पत्र दर्ता गरेको थियो।
