काठमाडौं । नेपाली कांग्रेसका सांसदसमेत रहेका नेपालका एकमात्र अर्वपति विनोद चौधरीका भाइ अरुण चौधरी पक्राउ परेपछि कांग्रेसका पूर्व महामन्त्री तथा सांसद शशांक कोइरालाले प्रधानमन्त्री पुष्पकमल दाहालले नेतृत्व गरेको अहिलेको सरकार असफल भएको र अब माधव नेपाललाई प्रधानमन्त्री बनाउनुपर्ने बताएका छन् ।
गृहजिल्लामा रहेका कोइरालाले एक्कासी माधव नेपाललाई प्रधानमन्त्री बनाउनुपर्ने आवाज उठाएका हुन् । अहिले कांग्रेससहितको गठबन्धनको सरकार छ । सरकारको नेतृत्व माओवादी केन्द्रका अध्यक्ष प्रचण्डले गरेका छन् । कांग्रेसका अरु नेताहरुले आफ्नो दलको नेतृत्वमा सरकार बनाउनुपर्ने आवाज उठाएको बेला शशांकले भने माधव नेपालको नेतृत्वमा सरकार बनाउनुपर्ने आवाज उठाएका हुन् ।
उनको यो अभिव्यक्ति आफ्ना मित्र विनोद चौधरीको भाइ पक्राउ परेलगत्तै आएको हो । उनले सम्बोधनको क्रममा भनेका छन्–‘प्रधानमन्त्री आफैं सरकारको कामकारबाहीबाट सन्तुष्ट हुनुहुन्न, त्यो भनेको प्रचण्डको सरकार असफल छ भन्ने हो । अब ढिला नगरी पूर्व सहमतिअनुसार माधव नेपाललाई प्रधानमन्त्री बनाउनुपर्छ ।’
