जनकपुरधाम । जनकपुरमा गाडी चोरी निकासीमा संलग्न गिरोहलाई प्रहरीले पक्राउ गरेको छ।
जिल्ला प्रहरी कार्यालय धनुषाले भन्सार छलेर ल्याएको चार वटा गाडीसहित चोरी निकासीमा संलग्न जनकपुर जलेश्वरका मोख्तार अन्सारी र महोत्तरी लोहरपट्टीका जमजम भनिने अन्सारुल कवारीलाई आइतबार पक्राउ गरी सार्वजनिक गरेको हो।
चोरी निकासी कार्यमा संलग्न अर्का एक जनाको भने खोजी भइरहेको प्रहरी उपरीक्षक (एसपी ) मित्रवन्धु शर्माले बताए। मोख्तारले भारतबाट गाडी चोरी निकासी गर्ने गरेको र अर्का जमजम भनिने कवारीले नेपालमा सो गाडी बेच्ने गरेको प्रारम्भिक अनुसन्धानमा खुल्न आएको प्रहरीले जनाएको छ।
पक्राउ परेका अभियुक्तलाई आवश्यक कानुनी कारबाही सुरु गरिएको प्रहरी उपरीक्षक शर्माले बताए।
