काठमाडौँ । सप्तरी जिल्लाको विष्णुपुर गाउँपालिकाका अध्यक्ष उमेशप्रसाद यादव, लेखापाल टेकबहादुर नारायण यादवसहित तीन जनाविरुद्ध अख्तियार दुरुपयोग अनुसन्धान आयोगले विशेष अदालतमा भ्रष्टाचार मुद्दा दर्ता गरेको छ ।
सोलार बत्ती जडान लगायतका योजनाको भुक्तानीबापत सेवाग्राहीसँग घुस माग गरेको भन्ने उजुरीका आधारमा आयोगले गरेको प्रारम्भिक छानबिनपछि मुद्दा दायर गरिएको हो ।
आयोगका प्रवक्ता भोला दाहालका अनुसार सोलार बत्ती जडान कार्य लगायतका आयोजनाहरुको कार्य सम्पन्न पश्चात गाउँपालिकाबाट रकम भुक्तानी गर्दा गाउँपालिका अध्यक्ष यादव, लेखापाल टेकनारायण र एमआइएस अपरेटर विरेन्द्रकुमार यादवसमेतको मिलेमतोमा सेवाग्राहीसँग पाँच लाख रुपैयाँ लिएको पुष्टि भएपछि मुद्दा दायर गरिएको हो ।
आयोगका अनुसार लेखापाल टेकनारायण र एमआईएस अपरेटर विरेन्द्रलाई सेवाग्राहीसँग नगद दुई लाख रुपैयाँ घुस लिइसकेको र तीन लाख रुपैयाँको चेकसहित गत साउन ३१ गते नियन्त्रणमा लिइएको थियो ।
आयोगले तीनै जनाविरुद्ध ५ लाख रुपैयाँ बिगो कायम गरी बिगो बमोजिम जरिवानासहित सजायको मागदाबी गरेको छ ।
