लहान । सिरहाको बरियारपट्टि गाउँपालिकामा भएका अनियमितताको धमाधम पर्दाफास हुनथालेको छ । यसै क्रममा यस गाउँपालिकाबाट सशस्त्र प्रहरीलाई ईन्धन खर्च शिर्षकमा २ लाख ५० हजार भुक्तानी भएको पाईएको छ भने दीपेन्द्रप्रसाद यादवको नाममा होली खर्च शिर्षकमा २ लाख रुपैयाँ निकास भएको देखिएको छ ।
महालेखापरीक्षक कार्यालयका अनुसार आर्थिक बर्ष २०७७ । २०७८ मा यस गाउँपालिकाले सशस्त्र प्रहरी बल नं. ७ हेड क्वाटर सिरहालाई ईन्धन खर्च शिर्षकमा २ लाख ५० हजार रुपैयाँ दिएको देखिएको छ । त्यस्तै होली खर्च शिर्षकमा दीपेन्द्रप्रसाद यादव नाम गरेका ब्यक्तिलाई २ लाख रुपैयाँ दिएको पाईएको छ ।
स्थानिय सरकार सञ्चालन ऐन २०७४ को दफा ७१ बमोजिम व्ययको बजेट अनुमान आन्तरिक आयको परीधिभित्र रही औचित्यताको आधारमा विविध खर्च गर्नुपर्ने ब्यवस्था छ । वितरणमुखी खर्चमा रोक लगाईएको छ ।
तर वरियारपट्टि गाउँपालिकाले वितरणमुखी खर्चमा मितव्यायिता नअपनाई ब्यक्तिका नाममा २ लाख र शिव मन्दिरमा धार्मिक कार्यक्रमका लागि शिव मन्दिर समितीलाई ९५ हजार ५ सय ९५ रुपैयाँ दिएको पाईएको छ , जुन ऐनसंगत नभएको भन्दै महालेखापरीक्षकको कार्यालयले गाउँपालिकालाई ध्यानाकर्षण गराएको छ ।
त्यस्तै २०७७ । १० । २२ मा रामानन्द जयन्ती मनाउन राजबंशि यादव नाम गरेको ब्यक्तिलाई गाउँपालिकाले १ लाख रुपैयाँ निकास गरेको देखिन्छ । स्थानिय सरकार सञ्चालन ऐन २०७४ मा स्थानिय तहको रकमबाट आर्थिक साहयता , चन्दा , पुरस्कार एवं सँस्थागत अनुदान वितरण गर्न पाउने ब्यवस्था छैन ।
