काठमाडौं । महानगरीय प्रहरी बृत्त बालाजुका डीएसपी रविन विष्ट रानीपोखरी तानिएका छन् ।
सोमबार यातायात मजदुरले बालाजु क्षेत्रमा गरेको आन्दोलनलाई नियन्त्रणमा लिन नसकेपछि डीएसपी विष्टलाई उपत्यका प्रहरी कार्यालय रानीपोखरी तानिएको हो ।
विष्ट तानिएपछि उनको स्थानमा त्रिभुवन विमानस्थल सुरक्षा कार्यालयका डीएसपी मनोजित कुँवरलाई पठाइएको छ । सोमबार आक्रोशित मजदुरहरुको समूहले प्रहरीको दुईवटा भ्यान र अस्थायी प्रहरी पोस्टमा आगजनी गरेका थिए ।
उक्त आन्दोलनलाई नियन्त्रण गर्न असफल भएपछि डीएसपी विष्टलाई रानीपोखरी तानिएको उपत्यका प्रहरी कार्यालयका एसएसपी हिमालयकुमार श्रेष्ठले जानकारी दिए ।
बालाजु र बसपार्क क्षेत्रमा मजदुरहरुले सडकमा उग्र प्रदर्शन गर्नुका साथै ल्होत्से मलसहितका केही व्यापारिक भवनमा लुटपाट पनि मच्चाएका थिए ।
