सबै जिप्रकालाई केन्द्रको ‘सर्कुलर’ : हत्या आरोपी सांसद कोइरीलाई पक्राउ गर्नू

काठमाडौं । प्रहरी प्रधान कार्यालयले हत्या अभियोग लागेका नेकपा एमालेका सांसद लक्ष्मी महतो कोइरीलाई पक्राउ गर्न ७७ वटै जिल्लामा सर्कुलर जारी गरेको छ। महोत्तरी क्षेत्र नं. १ का प्रतिनिधि सभा सांसद कोइरीलाई पक्राउ गर्न ७७ वटै जिल्लाका जिल्ला प्रहरी कार्यालयलाई निर्देशन दिइएको केन्द्रीय प्रहरी प्रवक्ता डीआईजी टेकप्रसाद राईले बताए।

कर्तव्य ज्यान मुद्दाका फरार प्रतिवादी कोइरीलाई पक्राउ गर्न गृह मन्त्रालयले प्रहरी प्रधान कार्यालयलाई पत्राचार गरेको छ।

संसद्मा उपस्थित भएको विषयमा प्रश्न उठेपछि उपप्रधानमन्त्री तथा गृहमन्त्री रवि लामिछानेले पटकपटक कोइरीलाई पक्राउ गर्न प्रहरीलाई  मौखिक निर्देशन दिएको तर निर्देशन पालना नभएको भन्दै मन्त्रालयले शुक्रबार विज्ञप्ति जारेको थियो। सो विज्ञप्तिमा मौखिक निर्देशन पालना नभएपछि लिखित रूपमै प्रहरी प्रधान कार्यालयलाई पत्राचार गरिएको जनाइएको छ।

बिहीबार सभामुखको निर्वाचनका क्रममा नेपाली कांग्रेसका सांसद रामहरि खतिवडाले कोइरी बैठकमा उपस्थित भए नभएको निर्क्यौल गर्न माग गरेका थिए। तर, महतोको बिहीबार संसद्मा उपस्थिति र हाजिरी देखिएन। यस्तै शनिबार उपसभामुखको निर्वाचनका क्रममा पनि सांसद खतिवडाले यस विषयमा प्रश्न उठाएका थिए। उनले गृहमन्त्रीको निर्देशन प्रहरी प्रशासनले टेर्न छोडेको हो भन्दै प्रश्न गरेका थिए।

हत्या अभियोगी सांसद कोइरीलाई पक्राउ गर्न ढिलाइ गरिएको भन्दै गृहमन्त्री र प्रहरीको आलोचना भइरहेको छ। डीआईजी राईले भने कोइरीको खोजी भइरहेको बताए। पुस ७ गते शपथकै दिन उनलाई पक्राउ गर्ने तयारी रहेकोमा उच्च अदालत जनकपुरको पत्र ढिला आइपुगेका कारण उनलाई पक्राउ गर्न नसकिएको राईले बताए।

‘शपथकै दिन पक्राउ गर्न सकिन्थ्यो। अदालतको पत्र ढिला आएकाले उनी उम्के,’ डीआईजी राईले भने, ‘खोजी गरिरहेका छौं। ७७ जिल्लामै पक्राउ गर्न निर्देशन जारी गरेका छौं।’

कोइरीमाथि मधेस आन्दोलनका क्रममा घाइते भई अस्पताल लैजाँदै गरेका सई थमन थापालाई एम्बुलेन्सबाट थुतेर हत्या गरेको अभियोग छ।

प्रतिक्रिया दिनुहोस

सम्बन्धित समाचार

नेपाल प्रहरी

नेपाल प्रहरीमा डीआईजीबाटै आईजिपी हुने अवस्था

नेपाल प्रहरीमा डीआईजीबाटै आईजिपी हुने अवस्था

अर्काेतर्फ केही डिआइजीहरू व्यक्तिगत स्वार्थका लागि सेवाहद हटाउन नहुने भनेर लबिइङमा लागेकाले पनि यसमा ढिलाई हुने सम्भावना छ । काठमाडौं । नेपाल प्रहरीमा नेतृत्व विकास..