झापा । शनिबार इलाका प्रहरी कार्यालय कुमरखोद दिनभर तनावपूर्ण बन्यो । इप्रका दमकबाट सादा पोसाकमा खटिएका प्रहरीले बिहान ४ बजे नै झापा गाउँपालिका –३ बस्ने अशोक राईको घरमा घेरा हालेपछि स्थिति तनावग्रस्त बनेको हो।
राई बाउन्स चेक दिने बैकिङ कसुरका फरार व्यक्ति हुन् । उनलाई पक्राउ गर्न पाँचजना व्यक्तिले घर घेरा हालेका थिए। तर, त्यसमध्ये ३ जना प्रहरी र दुईजना अन्य थिए । उनीहरूमध्ये एकजना कार चालक र अर्कोजना रकम पाउने व्यक्ति भएको स्थानीयले बताए । बिहानै नौला मान्छेले घर घेरा हालेपछि राई परिवारमा खैलाबैला मच्चियो ।
होहल्ला भएपछि स्थानीयवासी राईको घरमा पुगेका थिए । प्रहरीले गुण्डागर्दी शैलीमा राईको परिवारलाई दुर्व्यवहार गरेको भन्दै स्थानीय आक्रोसित भएका थिए । रिसाएका स्थानीय उनीहरूमाथि जाइलागेका थिए। त्यसक्रममा प्रहरी र स्थानीय बीच झडप भएको थियो । झडपका क्रममा रकम पाउने दुर्गा पौडेलका छोरा विशाल पौडेल घाइते भएका छन् । घाइते विशाल पौडेल र चालक बल्लतल्ल कार लिएर भागेका थिए ।
तीनैजना सादा पोसाकका प्रहरीलाई स्थानीयले आफ्नो नियन्त्रणमा लिएका थिए । नियन्त्रणमा रहेका सई केशव मगर , कृष्ण कार्की र गजेन्द्र रायमाझीलाई पछि कुमरखोद इलाका प्रहरी कार्यालयको टोलीले उद्धार गरेको थियो ।
उनीहरूलाई ईलाका प्रहरी कार्यालयमा ल्याएपछि वातावरण झन् तनावपूर्ण बनेको थियो । थप सुरक्षाका लागि सशस्त्र प्रहरी र जिल्लाबाट प्रहरी टोली झिकाइएको थियो ।
बैंकिङ्ग कसूरको मुद्दामा राईलाई अदालतबाट पक्राउ गर्न आदेश भए पनि पक्रिने शैली गलत भएको भन्दै स्थानीयले आक्रोश पोखेका थिए । प्रहरीले राईलाई पक्राउ नगरी आफै अदालतमा उपस्थित हुनु भनेको बुझिएको छ । पक्राउ पुर्जी भए पनि गलत शैलीका कारण राईलाई पक्रनबाट प्रहरी पछि हट्नु परेको हो।
