काठमाडौं । चार दिन अघि काठमाडौँबाट हराएका बालक भारतको पटनामा भेटिएका छन् । काठमाडौँ महानगरपालिका–३१ नगेन्द्रकान्छा चोकस्थित डेराबाट असार १ गते हराएका बालक भारतको पटनामा भेटिएका हुन् ।
डडेल्धुराको गन्यापधुरा गाउँपालिका वडा नम्बर १ का १४ वर्षीय नवीन रुवालीलाई पटनाको रेल्वे स्टेशनबाट उद्धार गरिएको प्रहरीले जनाएको छ।
बिहान साढे ६ बजे क्रिकेट खेल्न भनी निस्किएका भाइ नफर्केपछि दाइ भरत रुवाली सार्कीले भोलिपल्ट प्रहरी वृत्त नयाँबानेश्वरमा निवेदन दिएका थिए।
प्रहरीले खोजतलास गर्ने क्रममा बालक भारतको पटना पुगेको जानकारी भएपछि भारतीय प्रहरीको समन्वय र सहयोगमा खोजी गरिएको थियो । उनको उद्धार गरी दाजु भरत रुवाली सार्कीलाई जिम्मा लगाइएको प्रहरीले जनाएको छ।
