काठमाडौं । प्रधानमन्त्री शेरबहादुर देउवा भारतको नयाँ दिल्ली पुगेका छन् । तीन दिने औपचारिक भ्रमणका क्रममा चार मन्त्रीसहित नेपाली प्रतिनिधिमण्डलको नेतृत्व गर्दै प्रधानमन्त्री देउवा केही समय अगाडि दिल्ली पुगेका हुन् ।
दिल्लीको इन्दिरा गान्धी अन्तर्राष्ट्रिय विमानस्थलमा प्रधानमन्त्री देउवालाई भारतका रक्षा तथा पर्यटन राज्य मन्त्री अजय भट्टले स्वागत गरेका छन् । प्रधानमन्त्री देउवा चाणक्यपुरीस्थित आईटीसी मौर्य होटलमा बस्ने जानकारी गराइएको छ ।
यस्तो छ कार्यक्रम तालिका
आज ४ः३० बजे प्रधानमन्त्री देउवाले भारतीय विदेशमन्त्री एस जयशंकर र सुरक्षा सल्लाहकार अजित डोभालसँग भेट गर्नेछन् । त्यस्तै पाँच बजे सत्तारुढ भारतीय जनता पार्टी (भाजपा)को केन्द्रीय कार्यालयमा पुग्ने कार्यक्रम रहेको छ ।
त्यसपछि प्रधानमन्त्री देउवा नयाँदिल्लीस्थित नेपाली दूतावासले आयोजना गरेको रात्रिभोजमा सहभागी हुने कार्यक्रम रहेको छ ।
शनिबार (भोलि) प्रधानमन्त्री देउवाले समकक्षी नरेन्द्र मोदीसँग भेटवार्ता गर्नेछन् । त्यस्तै आइतबार बनारसको भ्रमण गर्ने र सोही दिन स्वदेश फर्किने कार्यक्रम रहेको छ ।
