काठमाडौं । नेपालका लागि अमेरिकी राजदूतमा डिन थम्पसन नियुक्त भएका छन् । अमेरिकी राष्ट्रपति जो बाइडनले थप्सनलाई नेपालका लागि राजदूत नियुक्त गरेका हुन् । थम्पसनले हालका अमेरिकी राजदूत र्याण्डी बेरीलाई प्रतिस्थापन गर्नेछन् ।
थम्पसन उनी हाल दक्षिण र मध्य एसियाली मामिलाका लागि राज्य विभागको प्रमुख उपसहायक सचिवको रूपमा सेवा गरिरहेका छन् । थम्पसनसँग अमेरिकी कूटनीतिमा २५ वर्षभन्दा बढी समयसम्म काम गरेको अनुभव छ ।
यसअघि, थम्पसन मलेसियाको क्वालालम्पुरस्थित अमेरिकी दूतावासको मिसनका उपप्रमुख थिए। उनीसँग रोमानियाको बुखारेष्टस्थित अमेरिकी दूतावास, भारतको कोलकातामा अमेरिकी कन्सुलर जनरल र श्रीलंकाको कोलम्बोस्थित अमेरिकी दूतावासको आर्थिक तथा वाणिज्य मामिला विभाग प्रमुखको रुपमा काम गरेको अनुभव छ ।
त्यस्तै उनले राज्य विभागको कार्यकारी सचिवालय स्टाफको निर्देशक, राज्य विभाग अपरेशन सेन्टरको उपनिर्देशक, अपरेशन सेन्टर क्राइसिस म्यानेजमेन्ट स्टाफको निर्देशक, र सूचना स्रोत व्यवस्थापनका लागि उपनिर्देशकको रूपमा काम गरेका छन् ।
हाल उनी अमेरिकाका लागि दक्षिण र मध्य एसियाली मामिला व्युरोका उपसहायक सचिव हुन् । अमेरिकी नीति र सो क्षेत्रका देशहरुसँगको सम्बन्धबारे हेर्ने जिम्मा उनलाई छ ।
