विराटनगर । धरान उपमहानगरपालिका-१८ को एक होटलमा मृत भेटिएकी महिलाको हत्या आरोपमा एक युवक पक्राउ परेका छन् ।
पाँचथर घर भई इटहरी उपमहानगरपालिका– ५ बस्दै आएकी ३८ वर्षीय सुमित्रा तामाङ गत मंगलबार न्यू कान्तिपुर होटल एण्ड लजमा मृत अवस्थामा भेटिएकी थिइन् । उनको हत्या आरोपमा प्रहरीले धनकुटा पाख्रिबास नगरपालिका–६ का २४ वर्षीय जीवन मगर भनिने विनेश राना मगरलाई पक्राउ गरेको हो । प्रहरीले उनलाई धनकुटाको पाख्रिबास नगरपालिका–११ बाट पक्राउ गरी आइतबार सार्वजनिक गरेको छ ।
जिल्ला प्रहरी कार्यालय सुनसरीका प्रहरी उपरीक्षक सञ्जयसिंह थापाका मृतक महिलाका श्रीमान वैदेशिक रोजगारीका लागि ब्रुनाइमा छन् । उनी माइतीमा बस्दै आएकी थिइन् ।हत्या आरोपमा पक्राउ परेका जीवन तीन महिनाअघि स्काभेटरमा काम गर्न भोजपुर पुगेका थिए ।
भोजपुर जानुअघि उनी इटहरीमा सिटी सफारी चलाउथे । सिटी सफारी चलाउने क्रममा मृतक सुमित्रासँग उनको चिनजान भएको प्रहरीको भनाइ छ ।फागुन १५ गते धरान उपमहानगरपालिका– १८ बुद्धचोकस्थित न्यू कान्तिपुर होटल एण्ड लजमा भेटेका उनीहरुबीच विवाद भएपछि युवकले राति नै हत्या गरेको प्रारम्भिक अनुसन्धानबाट खुलेको एसपी थापाले बताए ।
युवकविरुद्ध कर्तब्य ज्यान मुद्दामा अनुसन्धान भइरहेको एसपी थापाले जानकारी दिए ।
