रुपन्देही । रुपन्देही प्रहरीले भारतबाट अवैध रुपमा ल्याउँदै गरेको तथा अवैध रुपमा गाेदाममा भण्डारण गरिएकाे ८६ लाख ८ हजार ६ सय रकम बराबरको जुत्ता, चप्पलहरुसहित २ जनालाई नियन्त्रणमा लिएको छ ।
जिल्ला प्रहरी कार्यालय रुपन्देहीबाट खटिएको प्रहरी टोलीले आज दिउँसो साढे १२ बजे भारतबाट अवैध रुपमा ल्याउँदै गरेको १२ लाख बराबरको १८८ जोर जुत्ता र १२९६ मिटर थान कपडासहित रुपन्देही सैनामैना नगरपालिका २ बस्ने २८ वर्षीय चालक कृष्ण थापालाई नियन्त्रणमा लिएको छ ।
त्यस्तै गाडीमा सवार भएका सैनामैना नगरपालिका २ बस्ने ४० वर्षीय तुलसी थारु पनि नियन्त्रणमा लिएको छ ।
प्रहरी अनुसन्धानको क्रममा उक्त अबैध सामान भण्डारण गर्ने गरिएको अवैध गोदामलाई पहिचान गरी जिल्ला रुपन्देही बुटवल उप महानगरपालिका ५ विकाशपथस्थित रहेको गोदाममा बाट पनि सामग्री बरामद गरेको छ ।
उक्त गोदाम भित्र अवैध रुपमा राखिएका ६१३४ जोर (३१ कार्टुन) विभिन्न किसिमका पुरुष तथा महिलाका जुत्ताहरु, ५२५० जोर विभिन्न किसिमका पुरुष तथा महिलाका चप्पलहरु र ३२५ जोर सेण्डिल गरी ७४ लाख ८ हजार ६ सय बराबरको सामग्री बरामद गरेको छ ।
उनीहरुलाई पिकअप गाडी र उक्त गोदामबाट बरामद सामान सहित आवश्यक कारवाहीको लागि भन्सार कार्यालय बेलहिया रुपन्देही पठाइएको पनि प्रहरीले बताएको छ ।
