वीरगञ्ज । पर्सा प्रहरीले प्रतिबन्धित लागूऔषधसहित एक युवकलाई पक्राउ गरेको छ ।पक्राउ पर्नेमा बारा जिल्ला कलैया उपमहानगरपालिका वडा नम्बर १३ बलिरामपुर निवासी ३७ वर्षीय निरज कुमार महतो रहेका छन् ।
महतोलाई प्रहरीले सोमबार दिउँसो वीरगञ्ज महानगरपालिका वडा नम्बर २५ सिर्सियाबाट पक्राउ गरेको हो । विशेष सूचनाको आधारमा जिल्ला प्रहरी कार्यालय पर्साबाट खटेको टोलीले पैदल हिडेर भारतबाट नेपाल आइरहेको महतोमाथि शंका लागेर उनले बोकेको झोला चेकजाँच गर्दा कालो प्लाष्टिकमा लुकाइछिपाई ल्याएको लागूऔषध नुफ्रिन ८० एम्पुल, डाइजीपाम ८० एम्पुल र फेनारगण ८० एम्पुल गरी जम्मा २४० एम्पुल फेला पारेको पर्सा प्रहरीका प्रवक्ता एवम् प्रहरी नायव उपरीक्षक (डिएसपी) ओमप्रकाश खनालले जानकारी दिए ।
महतोलाई नियन्त्रणमा लिएर लागूऔषध सम्बन्धी कसूरमा अनुसन्धान अगाडि बढाइएको डिएसपी खनालले बताए ।
