धनकुटा । लोकसेवा आयोगले सञ्चालन गरेको सशस्त्र प्रहरी बलको जवान पदको परीक्षामा नक्कली परीक्षार्थीको आरोपमा तीन जनालाई प्रहरीले पक्राउ गरेको छ ।पक्राउ पर्नेमा सहिदभूमी गाउँपालिका ५ का सौहार्द राई, उदयपुरको वेलका नगरपालिका ७ का योगेन्द्र राई र निशान राई रहेको प्रहरीले जनाएको छ ।
पक्राउ पर्ने योगेन्द्र वास्तविक परीक्षार्थी भए पनि उनले सौहार्दलाई परीक्षा दिन लगाउने मनसाय देखिएको प्रहरीले जनाएको छ ।धनकुटा बहुमुखी क्याम्पस केन्द्रमा सञ्चालन भएको परीक्षामा १२४२० दर्ता नं रहेका योगेन्द्रको नाममा परीक्षा हल प्रवेश गर्दै रहेका सौहार्दलाई चेकजाँच गर्ने क्रममा नक्कली परीक्षार्थी भएको पुष्टि भएपछि प्रहरी नियन्त्रणमा लिएको थियो ।
उनलाई परीक्षा केन्द्रमा पुर्याउन मद्धत गर्ने निशानसमेत पक्राउ परेका हुन् । पक्राउ पर्ने तीनै जनाबारे थप अनुसन्धान अघि बढाइएको प्रहरीको भनाइ छ ।
