पाँचथर । सिक्किमसँगको सीमावर्ती क्षेत्र चिवाभञ्ज्याङबाट सशस्त्र प्रहरीले नियन्त्रणमा लिएको १ लाख २५ हजार ६ सय ६२ रुपैयाँ मूल्यको मदिरा सोमबार साँझ नष्ट गरेको छ ।सीमा सुरक्षाका लागि खटिएको सशस्त्र प्रहरीको चिवाभञ्ज्याङस्थित बोर्डर आउटपोस्ट ‘बीओपी’ बाट खटिएको सशस्त्र प्रहरीको गस्ती टोलीले तीन दिनअघि नियन्त्रणमा लिएर करदाता सेवा कार्यालयलाई बुझाएको मदिरा नष्ट गरेको हो ।
नष्ट गरिएकोमा ६१ हजार ८ सय २४ रुपैयाँ मुल्यको १ सय ६८ बोत्तल सिक्किमे रम, १७ हजार ८ सय १८ रुपैयाँको १ सय ५१ बोतल हिट बियर, १५ हजार ८ सय ७६ रुपैयाँको ५४ बोतल टाइगर रम, १४ हजार ८ सय ८० रुपैयाँको ४८ बोतल सिक्किमे कञ्चन ब्राण्डी रक्सी र १५ हजार २ सय ६४ रुपैयाँको फायरबल नामक २४ बोतल रक्सी रहेको सशस्त्र प्रहरीको २ नम्बर बाहिनी हिमशिखर गुल्म फिदिमका प्रमुख (डिएसपी) किशोरकुमार श्रेष्ठले जानकारी दिए ।
उनका अनुसार पुस ९ गते हिउँ परिरहेका बेला सिक्किमतिरबाट नेपालमा अवैध ढंगबाट लिएर आँउदै गरेको समूह सीमा सुरक्षा बलबाट खटिएका सुरक्षाकर्मीलाई देखेर भागेपछि उक्त परिमाणको रक्सी बरामद गरिएको थियो । करिब १५ जनाको समूहमा रहेका उनीहरुलाई हिउँ छिचोल्दै नियन्त्रणमा लिन नसकिएको बताइएको छ ।
उक्त मदिरा करदाता सेवा कार्यालय पाँचथरका निमित्त प्रमूख तुलसादेवी दाहाल नेतृत्वको टोलीले नष्ट गरेको छ ।भारततर्फबाट कर छलेर ल्याइएको अवैध मदिरा पाँचथर, ताप्लेजुङ र इलामका बजारमा खरिद मूल्यभन्दा तीन गुणा धेरैमा खरिद बिक्री हुने बताइएको छ ।
