जनकपुरधाम । प्रदेश २ को नामका लागि प्रदेशसभामा ५ वटा प्रस्ताव पेस गरिएको छ । बिहीबार (आज) बसेको प्रदेशसभाको ८औं अधिवेशनको दोस्रो बैठकमा नामाकरणका लागि ‘मधेस प्रदेश’, ‘जानकी प्रदेश’, ‘मध्य मधेस प्रदेश’ र ‘मिथिला भोजपुरा’ नाम पेस गरिएको हो ।
सत्तारुढ दल जनता समाजवादी पार्टी र नेकपा माओवादी केन्द्रबाट प्रदेश २ को नाम ‘मधेस प्रदेश’ प्रस्ताव पेस भएको छ, जसलाई प्रमुख प्रतिपक्षी दल लोकतान्त्रिक समाजवादी पार्टीले पनि समर्थन गरेको छ ।
त्यस्तै कांग्रेसले ‘मिथिला–भोजपुरा’ नामको प्रस्ताव पेस गरेको छ भने कांग्रेसकै प्रदेशसभा सदस्यले राजेश्वरप्रसाद साहले ‘मध्य मधेश’ प्रदेश प्रस्ताव पेस गरेका छन् । त्यस्तै सत्तारुढ दल नेकपा एकीकृत समाजवादी पार्टीको तर्फबाट प्रदेशको नाम ‘जानकी प्रदेश’ प्रस्ताव पेस गरिएको छ ।
यता नेकपा एमालेको तर्फबाट प्रस्ताव गरिएको नामाकरणको प्रस्ताव भने अझै पेस हुन सकेको छैन ।
