विराटनगर । तीन दिनदेखि वेपत्ता बालिकाको शव खाल्डोमा गाडेको अवस्थामा फेला परेको छ । मोरङको रंगेली नगरपालिका– २ नहर टोलकी २ वर्षीया बालिका निशा उराउको शव खाल्डोमा फेला परेको हो ।
दुई दिनदेखि बेपत्ता निशाको शव घरदेखि ६० मिटर टाढा पोखरी छेउमा खाल्डोमा पुरिएको अवस्थामा फेला परेको उनका बाबु चन्द्र उराउले बताए ।
‘आइतबारदेखि खोजिरहेका थियौं तर भेटेको थिएन, हिजो पनि राति १ बजेसम्म बस्यौ,’ उनले भने, ‘बिहानपख भर्खरै खनेको खाडी देखियो, खोतलेर हेर्दा छोरीको कपडा र शव देखेपछि प्रहरीलाई खबर गर्यौं ।’
पानीमा डुबेको आशंकामा आइतबार र सोमबार पोखरीमा जाल हानेर पनि खोजिएको थियो । तर मंगलबार घर नजिकै भर्खरै खनिएको खाल्डोमा शव देखिएपछि बुबा चन्द्रले हत्या गरी खाल्डोमा पुरिएको दाबी गरे ।बेपत्ता बालिकाको शव भेटिएपछि अनुसन्धान शुरु गरेको जिल्ला प्रहरी कार्यालय मोरङका प्रहरी नायव उपरीक्षक दीपक श्रेष्ठले बताए ।
