काठमाडौं । नेपाली कांग्रेसको १४ औँ महाधिवेशनको उद्घाटन सत्रमा नेपाल आउन लागेकी बंगालकी मुख्यमन्त्री ममता बनर्जीलाई नरेन्द्र मोदी नेतृत्वको केन्द्र सरकारले रोक लगाएको जनाइएको छ ।
शुक्रबार कांग्रेसको १४ औं महाधिवेशनको उद्घाटन समारोहमा तिथिको रुपमा नेपाल आउन लागेकी मुख्यमन्त्री बनर्जीलाई मोदी सरकारले रोकेको भारतीय सञ्चार माध्यहरूले जनाएका छन् ।
बंगालका मन्त्री तपस रोयले द हिन्दुस्तान टाइम्ससँग भनेका छन्, ‘मार्च(अप्रिलको विधानसभा र त्यसपछिको उप निर्वाचनमा पराजित भएपछि भारतीय जनता पार्टी (बिजेपी) निकै प्रतिशोधी भएको छ । उनीहरू ममता बनर्जीको लोकप्रियताको ईर्श्या गर्छन्।’
त्रिणमुल कांग्रेसकी अध्यक्ष बनर्जी नेपाल आउन भिसा नलाग्ने भए पनि विदेश भ्रमणअघि केन्द्रको सरकारबाट अनुमति लिनुपर्ने हुन्छ । तर, नेपाल आउन अनुमति लिँदा मोदी सरकारले नदिएको त्रिणमुल कांग्रेसको आरोप छ ।
मोदी सरकारले मुख्यमन्त्री बनर्जीलाई पटकपटक विदेश यात्रामा रोक लगाउँदै आएको पनि बताइएको छ । मुख्यमन्त्री बनर्जी पछिल्लो समय प्रधानमन्त्री मोदीविरुद्ध मोर्चा बनाउन सक्रिय रहेका कारण उनलाई मादी सरकारले यात्रामा कडाइ गरेको पनि भारतीय सञ्चारमाध्यमहरुले जनाएका छन् ।
