काठमाडौं । कोरोना भाइरसको नयाँ भेरियन्ट ‘ओमिक्रोन’ विश्वका ३० भन्दा बढी देशमा फैलिइसकेको छ । डेल्टा भेरियन्ट भन्दा पनि बढी खतरनाक मानिएको ‘ओमिक्रोन’ छिमेकी राष्ट्र भारतमा पनि फैलिन सुरु गरिसकेको छ ।
केही दिन अगाडि मात्रै भारतको कर्नाटकमा नयाँ भेरियन्ट ‘ओमिक्रोन’बाट दुई संक्रमित भएका थिए । त्यस्तै गुजरातको जामनगरमा पनि थप एक जना ओमिक्रोन संक्रमित भेटिएका छन् । संक्रमित व्यक्ति दुई दिन अगाडि मात्रै जिम्बाब्वेबाट भारत आएका भारतीय अधिकारीहरुले जनाएका छन् ।
अधिकारीहरुका अनुसार विमानस्थलमै उनको परीक्षण गर्दा कोरोना पोजेटिभ देखिएको थियो । जीनोम सिक्वेन्सिङ गर्दा उनमा ओमिक्रोन संक्रमण देखिएको बताइएको छ ।
यसरी संक्रमितहरु भेटिन थालेपछि महाराष्ट्रबाट मात्रै ३० जनाको ओमिक्रोन परीक्षणका लागि नमूना पठाइएको बताइएको छ । जहाँ विभिन्न देशका करिब ३ हजार यात्रुहरु आएका त्यहाँका अधिकारीहरुको भनाइ छ ।
