काठमाडौं । राप्रपाको एकता महाधिवेशनमा अध्यक्षका लागि अध्यक्ष कमल थापा र पूर्वमहामन्त्री, सांसद राजेन्द्र लिङ्देनबीच प्रतिस्पर्धा हुँदैछ।राप्रपामा मुख्यगरी अध्यक्ष, उपाध्यक्ष र महामन्त्रीमा थापा र लिङ्देन पक्षले उम्मेदवारी दिने तयारी गरेका छन्।
अध्यक्ष थापा पक्षबाट उपाध्यक्षमा विक्रम पाण्डे, वुद्धिमान तामाङ, ध्रुवबहादुर प्रधान, जयन्त चन्द, रोशन कार्कीलगायत चर्चामा छन्।राप्रपामा एक महिलासहित तीन जना उपाध्यक्ष रहने व्यवस्था छ।लिङ्देन पक्षबाट जगत गौचन, दुर्गा श्रेष्ठ, श्याम तिमिल्सीना उपाध्यक्षमा आकांक्षी छन्।महामन्त्री पदमा थापा पक्षबाट भाष्कर भद्रा, कुन्ती शाही र भुवन पाठकको चर्चा छ। राप्रपामा एक महिलासहित तीन जना महामन्त्री रहने व्यवस्था छ।
महामन्त्री पदमा लिङ्देन पक्षबाट गोविन्द खनिया, धवलशम्शेर राणा र रेखा थापा आकांक्षी छन्। यद्यपी अहिलेसम्म प्यानल नै घोषणा भने थापा र लिङ्देन पक्षले गरेका छैनन्।राप्रपामा एक सय ९९ सदस्यीय केन्द्रीय कार्यसमितिमध्ये एक सय ४९ जनाका लागि निर्वाचन हुँदैछ भने बाँकी निर्वाचित अध्यक्षबाट मनोनित हुन्छन्।
सहमहामन्त्री ७ जना, कोषाध्यक्ष, सहकोषाध्यक्ष, प्रवक्ता, सहप्रवक्ता पनि निर्वाचित अध्यक्षबाट मनोनित हुने व्यवस्था छ।तर निर्वाचन समितिले निर्वाचनको कार्यतालिका भने अझै सार्वजनिक गरेको छैन।
