तनहुँ । दुई छोराछोरीलाई पढाउन बन्दीपुर गाउँपालिका वडा नं ३ तामुङकी सरस्वती थापा डुम्रे बजार झरिन् । बुढा ससुरा, सासुआमा र देवर भएको परिवारबाट टाढिने उनको रहर होइन, बाध्यता थियो । नेपाली सेनामा कार्यरत उनका श्रीमानले जसोतसो आफ्ना छोराछोरीलाई राम्रो शिक्षा दिन बजार झरेका हुन् ।
परिवारबाट टाढा भए पनि आफनो गाँउघरको कर्म उनले बिर्सिएकी थिईनन् । असार होस् वा मंसिर, रोपाइँ गर्न सरस्वती गाँउ उक्लन्थिन् । यसपालि पनि पानी पर्न थालेपछि छोराछोरीलाई कोठामै राखेर रोपाइँ गर्न उनी असार १५ मा गाँउ गइन् । मंगलबार र बुधबार रोपाइँ गरेकी सरस्वती बिहीबार रोपाइँ सकेर बेलुका डुम्रे फर्किने सोचमा थिइन् । तर बुधबार रातिदेखि परेको अविरल वर्षा उनका लागि काल बनेर पस्याे ।
अचानक घरमाथिबाट आएको पहिरोले घर पुरिँदा सरस्वतीकाे ज्यान गयो । बिहीबार बिहान अन्दाजी साढे तीन बजे आएको पहिरोमा परी घरका सबै सदस्य पुरिए । झण्डै एक घण्टापछि स्थानीय गाँउलेले उद्धार गर्ने क्रममा सरस्वती मृत भेटिइन् भने परिवारका अन्य सदस्य घाइते अवस्थामा । घाइतेलाई उपचारका लागि दमौलीस्थित जिल्ला अस्पतालमा ल्याइयो ।
पहिरोमा परी सरस्वती थापाका ६६ वर्षीय ससुरा दिलबहादुर थापामगर, ५८ वर्षीया सासुआमा दाउरीमाया थापामगर र २६ वर्षीय देवर सुवास थापामगर घाइते भएका छन् । घाइतेहरुको दमौली अस्पतालमा सामान्य उपचार पश्चात पोखरा रिफर गरिएको छ ।सरस्वतीका देवर सुवासले भने, “पोहर गोठमा पहिरो गएको थियो । यसपालि पहिरोले घरै भत्काउँदा परिवारकै सदस्य गुमाउनुपर्यो ।”
गाउँमा शोक र त्रास
पहिरोले सोही ठाँउको अर्को घर भत्किँदा ७० वर्षीया हरिमाया बसेलको पनि ज्यान गएकाे छ । एउटै गाँउका दुई जनाको मुत्यु भएपछि गाउँ नै शोकमा छ, त्रासमा छ । बन्दीपुरकै ५ नम्बर वडामा पनि ३ घर पहिरोले पुरिएका छन् भने ८ घर विस्थापित भएकाे गाँउपालिका अध्यक्ष पूर्णसिं थापाले जानकारी दिए । उनका अनुसार ‘१ नम्बर वडामा पनि ८ वटा घर पुरिएका छन् भने १८ भन्दा बढी घर विस्थापित भएका छन् ।
त्यस्तै जिल्लाकै व्यास नगरपालिकाको छाब्दी खोलामा आएको बाढीले पक्की पुल बगाइदिएको छ । व्यास १ र १३ जोड्ने पक्की पुल बाढीले बगाएका कारण आवतजावत ठप्प छ । शुक्लागण्डकी नगरपालिका वडा नं ९ स्थित सिम्लेमा पहिरोले पुरिएका दुई जनाको जीवितै उद्धार गरिएको छ । एकै घरका हजुरआमा र नातिको उद्धार गरिएको वडाध्यक्ष कृष्णप्रसाद रेग्मीले जानकारी दिए । ५५ वर्षीया खगिमाया भुजेल र १४ वर्षीय नाति विज्ञान भुजेलको जिवितै उद्धार गरि पोखरा स्थित गण्डकी मेडीकल कलेजमा उपचार गरिएको छ ।
पहिरोले भुजेलका ९ बाख्रा र एक भैँसी पनि मरेका छन् । सोही वडाका टेक बहादुर महतको गोठमाथिबाट आएको पहिरोले १० बाख्रा र एक भैँसी मरे । वडाअध्यक्ष रेग्मीका अनुसार यहाँका पाँच घर जोखिममा परेको छ ।
म्याग्दे गाँउपालिका वडा नं ५ मा पनि पहिरोमा परी बाबुछोरा घाइते भएका छन् । पाँच कोठाको ब्लकले बनेको घरमा माथिबाट खसेको पहिरोले लागि ४५ वर्षीय बुद्धिबहादुर परियार र उनका २५ वर्षीय छोरा रोजन परियार घाईते भएका हुन् । दुबै जनाको भिमाद पोलिक्लिनिकमा उपचार भईरहेको छ ।
पृथ्वी राजमार्ग १२ घण्टापछि एकतर्फी सुचारु
यता, पहिरोले अवरुद्ध बनेको पृथ्वी राजमार्ग १२ घण्टापछि एकतर्फी सूचारु भएको छ । पृथ्वीराजमार्ग अन्तर्गत व्यास नगरपालिका–१२ छिर्कने, बन्दीपुर गाउँपालिका–१ चिसापानी, डुम्रे, बन्दीपुर गाउँपालिका–५ याम्पामा गएको पहिरोहरु हटाएर एकतर्फी सञ्चालनमा ल्याईएको जिल्ला प्रहरी कार्यालय तनहुँले जनाएको छ ।सडकमा पहिरो गएपछि बिहीबार बिहान २ः३० देखि विहीबार दिउँसो २ः३० बजेसम्म पृथ्वी राजमार्ग दुवैतर्फ अवरुद्ध भएको थियाे ।
डोजरले पहिरो हटाएर सुचारू गरिएको जिल्ला प्रहरी कार्यालय तनहुँका प्रवक्ता युवराज तिमिल्सिनाले जानकारी दिए । उनका अनुसार सहायक मार्गहरु डुम्रे-वेँशीसहर र खैरेनीटार-भिमाद एवं बुद्धसिंह मार्गमा पनि पहिरालेले सडक अवरुद्ध भएको छ ।
डुम्रे-बेँसीसहर सडक खण्डमा भानु नगरपालिका–१ को भन्सार र वडा नम्बर ८ को पाँच सय फाँटमा पहिरो खसेकाले राजमार्ग अवरुद्ध भएको उनले बताए । ती स्थानमा पहिरोलाई डोजरले हटाउने काम भइरहेको छ ।
